Իրանը դադարեցրել է ԱՄՆ-ի հետ բանակցությունները

Իրանը հայտարարել է, որ դադարեցնում է Միացյալ Նահանգների հետ բանակցային գործընթացը՝ պայմանավորված Լիբանանում ստեղծված իրավիճակի սրմամբ։ Այս մասին հայտնել է Tasnim գործակալությունը՝ հղում անելով իր աղբյուրներին։

Հաղորդվում է, որ Թեհրանը նման որոշումը կապել է Լիբանանում շարունակվող ռազմական գործողությունների հետ՝ նշելով, որ այդ ուղղությամբ իրավիճակի կայունացումը նախապես դիտարկվում էր որպես հրադադարի պահպանման կարևոր պայման։ Այդ պատճառով իրանական կողմը որոշել է դադարեցնել ինչպես ուղիղ շփումները, այնպես էլ միջնորդների միջոցով հաղորդակցությունը։

Միաժամանակ Իրանը հայտարարել է, որ պատրաստ է նաև այլ պատասխան քայլերի՝ ներառյալ Օրմուզի նեղուցում իրավիճակի վերահսկման ուժեղացումը և ակտիվության ընդլայնումը այլ ռազմավարական ուղղություններով, այդ թվում՝ Բաբ էլ-Մանդեբի նեղուցի հատվածում։

Ավելի վաղ տեղեկություններ էին տարածվել, որ Իսրայելի բանակը վերջին օրերին ակտիվացրել է ռազմական գործողությունները Լիբանանում՝ չնայած նրան, որ մոտ երկու շաբաթ առաջ կողմերը համաձայնության էին եկել հրադադարի ռեժիմը երկարաձգելու շուրջ։