Իրանում հրապարակել են ԱՄՆ-ի հետ հնարավոր խաղաղ համաձայնագրի նախագծի հիմնական կետերը

Իրանական Mehr գործակալությունը հրապարակել է ԱՄՆ-ի հետ հնարավոր խաղաղ համաձայնագրի նախագծի հիմնական դրույթները՝ հղում անելով բանակցային գործընթացին մոտ կանգնած աղբյուրին։ Ըստ հրապարակման՝ փաստաթուղթը բաղկացած է 14 կետից և նախատեսում է ռազմական գործողությունների դադարեցման ու հարաբերությունների կարգավորման փուլային մեխանիզմ։

Նախագծով նախատեսվում է անհապաղ ամբողջական հրադադար բոլոր ուղղություններով, այդ թվում՝ Լիբանանում, ինչպես նաև 30 օրվա ընթացքում ծովային շրջափակման վերացում և Օրմուզի նեղուցի վերաբացում՝ իրանական կանոնների պահպանմամբ։ Փաստաթուղթը նաև ենթադրում է, որ ԱՄՆ-ը պարտավորվում է չմիջամտել Իրանի ներքին գործերին, հարգել երկրի ինքնիշխանությունը և դուրս բերել ուժերը Իրանի սահմանամերձ որոշ շրջաններից։

Համաձայն հրապարակված տվյալների՝ քննարկվում է նաև նավթի և նավթամթերքի նկատմամբ սահմանափակումների վերացումը, Իրանի համար ֆինանսական միջոցների հասանելիության ապահովումը, ինչպես նաև երկրի վերականգնման ծրագրի մշակում՝ առնվազն 300 միլիարդ դոլարի չափով։ Հաջորդ 60 օրերի ընթացքում նախատեսվում է առանձին բանակցային փուլ անցկացնել միջուկային ծրագրի, պատժամիջոցների վերացման և ՄԱԿ-ի որոշ սահմանափակումների վերանայման շուրջ։

Միաժամանակ Իրանի արտգործնախարարության ներկայացուցիչ Իսմայիլ Բաղային հայտարարել է, որ վերջնական փաստաթուղթ դեռ չկա և շրջանառվող տեղեկությունները վաղաժամ են։ Axios-ի տվյալներով՝ հնարավոր համաձայնագիրը դեռ պետք է ստանա Իրանի գերագույն ղեկավարի հաստատումը։