Ռոնալդուն ակնարկել է ֆուտբոլային կարիերան շուտով ավարտելու մասին

Պորտուգալացի ֆուտբոլիստ Կրիշտիանու Ռոնալդուն հայտարարել է, որ մեկնարկած մրցաշրջանը, հավանաբար, վերջինը կլինի իր պրոֆեսիոնալ կարիերայում։ Ֆուտբոլիստն այս մասին պատմել է Vogue-ին տված համատեղ հարցազրույցում՝ Ջորջինա Ռոդրիգեսի հետ, փոխանցում է ՌԻԱ Նովոստին։

Ռոնալդուի խոսքով՝ ֆուտբոլից հեռանալուց հետո իր ապագայի ծրագրերն արդեն կազմված են։ Նա ցանկանում է ավելի շատ ժամանակ հատկացնել ընտանիքին, ճանապարհորդել, զվարճանալ և զբաղվել փադելով։ 25 տարի պրոֆեսիոնալ ֆուտբոլին նվիրելուց հետո Ռոնալդուն խոստովանել է, որ կարիերայի ավարտը մեծ դատարկություն կթողնի իր կյանքում, որը ցանկանում է լրացնել այլ զբաղմունքներով։

Ռոնալդուն նախկինում ևս բազմիցս խոսել է կարիերան ավարտելու մասին, սակայն այս անգամ առաջին անգամներից է, երբ ընթացիկ մրցաշրջանն անվանել է հնարավոր վերջինը։ Ներկայում նրա հաշվին կա 976 գոլ, և պորտուգալացուն ևս 24 գոլ է անհրաժեշտ՝ կարիերայում 1000 գոլի պատմական սահմանին հասնելու համար։