Ի՞նչ նպատակով է իշխանությունը հիշել սպարապետ Վազգեն Սարգսյանին

Ինչպես հայտնի է, նախորդ շաբաթ սպարապետ Վազգեն Սարգսյանի հայրական օջախ էր այցելել ՀՀ վարչապետ Տիգրան Սարգսյանը։ Այսօր էլ Տիգրան Սարգսյանի օրինակին հետեւել է ՀՀ Պաշտպանության նախարար Սեյրան Օհանյանը։ Նրանց այցելության առիթը, գոնե պաշտոնական լրահոսի շրջանակներում, ներկայացվում է Հայոց բանակի 20–ամյա հոբելյանը։ Թե որքանով է բարոյական բանակի հիմնադիր, հայոց նորանկախ պետության առանցքային դեմքերից մեկին՝ Վազգեն Սարգսյանին հոբելյանական առիթից առիթ հիշելը, առանձին քննարկման նյութ է։ Ռեալ քաղաքականության ենթատեքստում ՀՀ բարձրաստիճան պաշտոնյաների այս գործողությունները բոլորովին այլ նպատակի են միտված։
ԼՈՒՐԵՐ.com–ի տեղեկություններով երկրի առաջին դեմքերի մակարդակով նոր «օպերացիա» է մշակվել՝ շահարկելով Վազգեն Սարգսյանի գերեզմանը, ընդդիմադիր Հայ Ազգային Կոնգրեսից «պոկել» ընդդիմադիր դաշինքի ընտրական ցուցակի երրորդ ամենառեալ թեկնածուին՝ «Հանրապետություն» կուսակցության առաջնորդ Արամ Սարգսյանին։ Իշխանության՝ հեռուն գնացող նպատակներով է պայմանավորված այցելությունները սպարապետի ընտանիքին՝ մորը՝ տիկին Գրետային եւ հորը՝ Զավեն Սարգսյանին։
Ի դեպ՝ Արամ Սարգսյանը պատկանում է քաղաքական գործիչների այն շարքին, որոնք անկեղծ են եւ բավականին էմոցիոնալ իրենց տեսակով, ըստ այդմ՝ խիստ խոցելի են եւ շուտ տրվող էմոցիաներին՝ ե՛ւ դրական, ե՛ւ բացասական իմաստով։
Վազգեն Սարգսյանի նկատմամբ խիստ հանկարծակի առաջացած հիշողություններն ու այդ առանցքում իշխանության գործողությունները միտված են Սարգսյանների ընտանիքին ՀԱԿ–ից հեռացնելուն, եւ դեպի ռեժիմը «թեքելուն»։ Վազգեն Սարգսյանին PR նպատակներով հիշելը բարոյակա՞ն է, թե՞ ոչ՝ թողնում ենք առանց մեկնաբանության։ Այս պահին միայն։