Ուկրաինայի ժողովուրդը չպետք է ընտրություն կատարի Արևելքի և Արևմուտքի միջև. Օբամա

Ինչպես հայտնում է itar-tass-ը, ԱՄՆ-ն Ուկրաինայի իրադրությունը չի դիտարկում Արևելքի և Արևմուտքի միջև հակամարտության լույսի ներքո և հանդես է գալիս այն բանի օգտին, որ այդ երկիրը լավ հարաբերություններ ունենա թե′ Ռուսաստանի, թե′ Եվրոպայի հետ: Այս մասին ԱՄՆ-ի նախագահ Բարաք Օբաման մարտի 24-ին հայտարարել է նիդերլանդական Volkskrant թերթում հրապարակված հարցազրույցում:

«Միացյալ Նահանգները Եվրոպան չի դիտում որպես մարտադաշտ Արևելքի և Արևմուտքի միջև»,- ասել է Օբաման: «Մենք նաև Ուկրաինայի իրադրությունը չենք դիտարկում որպես զրոյական արդյունքով խաղ (այսինքն՝ երբ մեկի հաղթանակը վերածվում է մյուսի պարտության)»,- նշել է նախագահը: -Այս մտածողությունը պետք է վերանար «սառը պատերազմի» հետ մեկտեղ,- նշել է նա:

«Ուկրաինացի ժողովուրդը չպետք է ընտրություն կատարի Արևելքի և Արևմուտքի միջև: Ընդհակառակը, կարևոր է, որ Ուկրաինան լավ հարաբերություններ պահպանի ԱՄՆ-ի, Ռուսաստանի և Եվրոպայի հետ,- հայտարարել է Օբաման:- Ինչպես ես արդեն ասել եմ, Ուկրաինայի ապագան պետք է որոշի ուկրանացի ժողովուրդն ինքը»:

ԱՄՆ-ի նախագահն այն կարծիքին է, որ Ուկրաինայում Ռուսաստանի գործողությունները «բացարձակապես անընդունելի են»: «Կարևոր է՝ Ռուսաստանը հասկանա, որ միջազգային հանրակցությունը չի ճանաչի Ուկրաինայի ինքնիշխանության և տարածքային ամբողջականության խախտումը»,- ասել է Օբաման: