Բաքվում բողոքում են ՀՀ ԶՈւ ԳՇ պետի Ադրբեջան հնարավոր այցի դեմ

Ադրբեջանի, այսպես կոչված, «Ղարաբաղի ազատագրության կազմակերպությունը» հայտարարել է, որ ամեն գնով կձախողի ԱՊՀ երկրների զինված ուժերի գլխավոր շտաբների պետերի կոմիտեի` առաջիկայում Բաքվում անցկացվելիք նիստը, եթե այնտեղ ժամանի նաեւ Հայաստանի Հանրապետության զինված ուժերի Գլխավոր շտաբի պետը: Այս մասին haqqin.az լրատվական կայքը հայտարարել է կազմակեպության առաջնորդ Աքիֆ Նաղին:

«Մենք ամեն ինչ կանենք, որպեսզի խափանենք այդ միջոցառումը, եթե այնտեղ հայտնվի հայաստանցի գեներալը: Անհրաժեշտ է ամեն բան անել, որպեսզի թույլ չտրվի նրա մասնակցությունն այդ նիստին: Այսօրվանից սկսած մենք մոբիլիզացնում ենք մեր բոլոր կողմնակիցներին հայ գեներալի` Բաքու այցի դեմ բողոքի ակցիաներ անցկացնելու համար», -ասել է նա:

ՀՀ ՊՆ մամուլի քարտուղար Արծրուն Հովհաննիսյանն այսօր հերքել է ապրիլի 7-8-ին Բաքվում անցկացվելիք ԱՊՀ երկրների ԶՈւ ԳՇ պետերի կոմիտեի նիստին ՀՀ ԶՈւ Գլխավոր շտաբի պետ, գեներալ-գնդապետ Յուրի Խաչատուրովի մասնակցության վերաբերյալ ադրբեջանական մամուլում տարածված լուրերը: