Վրաստանը չպետք է շտապի ՆԱՏՕ-ին անդամակցության գործողությունների ծրագիրն ստանալու հարցում

Վրաստանը չպետք է իրադարձություններից առաջ անցնի ՆԱՏՕ-ին անդամակցության գործողությունների ծրագիրն ստանալու հարցում: Այդ մասին դաշինքի գլխավոր քարտուղարի հատուկ ներկայացուցիչ Ջեյմս Ապատուրայը հայտարարել է Հանրային հեռարձակողի «Առաջին ալիքին» տված հարցազրույցում՝ մեկնաբանելով ռազմաքաղաքական դաշինքի սեպտեմբերյան գագաթնաժողովը:

«Վրաց ժողովուրդը չպետք է իրադարձություններից առաջ անցնի ՆԱՏՕ-ին անդամակցության գործողությունների ծրագիրն ստանալու հարցում: Մենք դեռևս այդ հարցը չենք քննարկել բարձր մակարդակով: Իհարկե, ձեր երկիրը շատ բան է արել ՆԱՏՕ-ին ինտեգրացվելու ճանապարհին, բայց այսօր նա կանգնած է մարտահրավերի առջև. զարգացման որ ճանապարհը մենք կընտրենք, արդյոք այն ՆԱՏՕ-ի հետ մերձեցումն է: Մենք խոստանում ենք, որ կօգնենք ձեզ դա անել: Բայց այս փուլում մենք պետք է զսպենք մեր ցանկություններն ու ակնկալիքները: Կարծում եմ, որ մենք պետք է առաջ ընթանանք աստիճանաբար, քայլ առ քայլ: Առայժմ ես չեմ լսել դաշինքի ընդլայնմանը վերաբերող որևիցե նոր կանոնի մասին»,-նշել է Ապատուրայը:

Միևնույն ժամանակ ՆԱՏՕ-ի գլխավոր քարտուղարի հատուկ ներկայացուցիչը վստահություն է հայտնել, որ «սեպտեմբերին կկատարվի նոր առաջքայլ, և Վրաստանը գոհ կմնա»: