Boeing 777-ի ուղևորների հարազատները դատարան կդիմեն` բազմամիլիոնանոց փոխհատուցման համար

Մալայզիական կորած Boeing 777-200-ի 115 ուղևորների հարազատները որոշել են բազմամիլիոնանոց փոխհատուցման վճարման հասնել Boeing ընկերությունից և Մալայզիայի ավիաընկերությունից: Այս մասին հայտնել է Չիկագոյի «Ռիբեկ լոե իրավաբանական ընկերության պաշտոնական ներկայացուցիչը, որն ավիահանրանավի կործանման առնչությամբ գործ բացելու միջնորդությամբ դիմել է Իլինոյսի նահանգի օկրուգային դատարան:

«Մենք համոզված ենք, որ երկու պատասխանողներն էլ մեղավոր են ինքնաթիռի կործանման հարցում, որտեղ եղել են 227 ուղևոր և անձնակազմի 12 անդամ»,- լրագրողներին հայտարարել է ընկերության առաջատար իրավաբան Մոնիկա Քելլին: Դատարան դիմելը հետևել է մարտի 24-ին այս ավիաընկերության կողմից Կուալա Լումպուրում արված հայտարարությանը: «Խորին ցավով մենք հարկադրված ենք հայտնել, որ ՄՆ370 չվերթն աղետի է ենթարկվել, և ինքնաթիռում գտնվող բոլոր ուղևորներն ու անձնակազմի անդամները զոհվել են,- ասված է փաստաթղթում:- Բոլոր տվյալները վկայում են, որ ինքնաթիռն ընկել է Հնդկական օվկիանոսի հարավային մասում»:

Մինչդեռ Ավստրալիան մարտի 26-ին վերսկսել է մալայզիական կորած Boeing-ի որոնման միջազգային գործողությունը 24-ժամյա ընդմիջումից հետո, որը կապված էր անբարենպաստ եղանակային պայմանների՝ փոթորկի, քամու՝ ժամում մինչև 80 կիլոմետր պոռթկումների, սաստիկ անձրևի և տեսանելիության կտրուկ վատթարացման հետ: Նավերն ու ինքնաթիռները կրկին մեկնել են այն գոտի, որը գտնվում է երկրի արևմտյան ծովեզերքից մոտավորապես 2,5 հազար կիլոմետր հեռավորության վրա: