Ուկրաինայի ՆԳ նախարարությունը ծառայողական հետաքննություն է անցկացնում Մուզիչկոյի գործով. Ավակով

Ինչպես հայտնում է «Ինտերֆաքս»-ը, Ուկրաինայի ներքին գործերի նախարարությունը պատրաստ է հասարակական դիտորդներին թույլ տալ ծանոթանալու իրավապահների կողմից Ալեքսանդր Մուզիչկոյի, որը հայտնի է նաև որպես Սաշկո Բիլի, ձերբակալման ժամանակ զենքի կիրառման հետաքննության նյութերին: Այդ մասին հայտարարել է հանրապետության ՆԳ նախարար Արսեն Ավագովը:

«Հաշվի առնելով Ալեքսանդր Մուզիչկոյի ձերբակալման նպատակով ՆԳՆ-ի հատուկ գործողության հասարակական մեծ արձագանքը` որոշում է ընդունվել հրապարակել այն գիշերվա իրադարձությունների առավելագույն մանրամասն խրոնոլոգիան, բացի այդ առավելագույնս թափանցիկ դարձնել ոստիկանության աշխատակիցների կողմից զենքի կիրառման իրավաչափության ստուգման ծառայողական հետաքննության արդյունքները: Բացի այդ, ՆԳՆ-ն պատրաստ է այդ հետաքննության արդյունքների գնահատմանը մասնակից դարձնել հասարակայնության լիազոր ներկայացուցչին»,- ասել է նախարարը, հաղորդվում է ՆԳՆ-ի կայքում:

Դրանում տեղեկատվություն է հրապարակված Մուզիչկոյի նկատմամբ քրեական վարույթի հետաքննության ընթացքի մասին:

Ավելի վաղ Ուկրաինայում «Աջ հատվածի» ներկայացուցիչը հրապարակել է կազմակերպության հայտարարությունը, որը վրեժխնդրության սպառնալիք է պարունակում ներքին գործերի նախարար Արսեն Ավակովի նկատմամբ Ալեքսանդր Մուզիչկոյի մահվան համար: Համապատասխան հայտարարությունը մամուլի ասուլիսում ընթերցել է Ռովնոյի մարզում «Աջ հատվածի» համակարգող Ռոման Կովալը:

«Մենք վրեժ ենք լուծելու Արսեն Ավակովից մեր եղբոր մահվան համար: Սաշկո Բիլիի գնդակահարումը նախարարի պատվիրած սպանությունն էր, նկատի առնելով այն, որ Մուզիչկոն որևէ քրեական գործի ծանուցագիր չէր ստացել, և նրան ոչ մի տեղ չեն կանչել»,-հայտարարել է Կովալը:

Կուսակցությունում չեն հավատում ՆԳ նախարարությանի պաշտոնական վարկածին՝ այն որակելով «սուտ»: «Չէ՞ որ Սաշկո Բիլիի ձեռքերը կապված էին, և նա ֆիզիկապես չէր կարող կրակել»,-ասված է հայտարարության մեջ:

ՆԳ նախարարությունը մարտի 25-ին հայտարարել է, որ Ալեքսանդր Մուզիչկոն սպանվել է Ռովնոյի մարզում զինված խմբավորման վնասազերծման հատուկ գործողության ընթացքում:

Ուկրաինայի ներքին գործերի առաջին փոխնախարար Վլադիմիր Եվդոկիմովը հայտնել է, որ մարտի 9-ին Ալեքսանդր Մուզիչկոն կասկածյալ է հայտարարվել, իսկ մարտի 12-ին նրա նկատմամբ հետախուզում է հայտարարվել: