Ֆրանսիայի արբանյակները հայտնաբերվել են մալայզիական ինքնաթիռի հարյուրից ավելի ենթադրվող բեկորներ

Առնվազն 122 օբյեկտ է հայտնաբերվել ֆրանսիական արբանյակների կողմից, որոնք կարող են լինել Malaysia Airlines-ի կորած ինքնաթիռի բեկորները: Այդ մասին մարտի 26-ին լրագրողներին հայտնել է Մալայզիայի տրանսպորտի նախարար Հիշամուդդին Հուսեյնը:

Օբյեկտները հայտնաբերվել են Ավստրալիայի Պերտ քաղաքից մոտավորապես 2,5 հազար կիլոմետր հեռավորության վրա: Արբանյակների հայտնաբերած մի քանի ֆրագմենտներ ավելի քան 20 մետր երկարություն ունեն, մամուլի ասուլիսում նշել է Հուսեյնը:

Ավելի վաղ Չիկագոյի «Ռիբեկ լո» իրավաբանական ընկերության պաշտոնական ներկայացուցիչը, որն ավիահանրանավի կործանման առնչությամբ գործ բացելու միջնորդությամբ դիմել է Իլինոյսի նահանգի օկրուգային դատարան, հայտնել է, որ մալայզիական կորած Boeing 777-200-ի 115 ուղևորների հարազատները որոշել են բազմամիլիոնանոց փոխհատուցման վճարման հասնել Boeing ընկերությունից և Մալայզիայի ավիաընկերությունից:

«Մենք համոզված ենք, որ երկու պատասխանողներն էլ մեղավոր են ինքնաթիռի կործանման հարցում, որտեղ եղել են 227 ուղևոր և անձնակազմի 12 անդամ»,-լրագրողներին հայտարարել է ընկերության առաջատար իրավաբան Մոնիկա Քելլին: Դատարան դիմելը հետևել է մարտի 24-ին այս ավիաընկերության կողմից Կուալա Լումպուրում արված հայտարարությանը: «Խորին ցավով մենք հարկադրված ենք հայտնել, որ ՄՆ370 չվերթն աղետի է ենթարկվել, և ինքնաթիռում գտնվող բոլոր ուղևորներն ու անձնակազմի անդամները զոհվել են,- ասված է փաստաթղթում:- Բոլոր տվյալները վկայում են, որ ինքնաթիռն ընկել է Հնդկական օվկիանոսի հարավային մասում», հաղորդել է «Ինտերֆաքս» գործակալությունը: