ՄԱԿ-ի Գլխավոր ասամբլեան կքննարկի բանաձև, որը չի ճանաչի Ղրիմը Ռուսաստանի մաս լինելու որոշումը

ՄԱԿ-ի Գլխավոր ասամբլեան մարտի 27-ին լիագումար նիստ կանցկացնի Ուկրաինայի իրադրության շուրջ: Նիստի ընթացքում կքննարկվի բանաձևի նախագիծ, որը կոչ է անում երկրներին չճանաչել մարտի 16-ի հանրաքվեի արդյունքների հիման վրա Ռուսաստանի կազմ Ղրիմի մտնելը: Այս մասին հայտնում է itar-tass-ը:

Ըստ առկա տեղեկատվության՝ ԳԱ-ի նիստում Կիևը ներկայացնելու է Ուկրաինայի արտաքին գործերի նախարարի պաշտոնակատար Անդրեյ Դեշչիցան:

Իրազեկ աղբյուրների տվյալներով՝ փաստաթղթի համահեղինակ են դարձել քսանից ավելի երկիր, այդ թվում՝ Ուկրաինան, ԱՄՆ-ն, Կանադան, Լեհաստանը և Լիտվան: Բանաձևի նախագծում ընդգծվում է, որ հանրաքվեն «անվավեր է և չի կարող հիմք ծառայել Ղրիմի Ինքնավար Հանրապետության կամ Սևաստոպոլ քաղաքի կարգավիճակի փոփոխման համար»: Փաստաթուղթը կոչ է անում երկրներին ձեռնպահ մնալ «Ուկրաինայի ազգային միասնության ու տարածքային ամբողջականության խախտմանն» ուղղված գործողություններից, այդ թվում՝ «ուժի կիրառման սպառնալիքների և անօրինական այլ գործողությունների ճանապարհով» նրա սահմանները վերաձևելու փորձերից: Տեքստում մատնանշվում է իրադրությունը «ուղղակի քաղաքական երկխոսության ճանապարհով» կարգավորելու անհրաժեշտությունը:

Մարտի 15-ին Ռուսաստանը վետո էր դրել ՄԱԿ-ի Անվտանգության խորհրդի համանման բանաձևի վրա: Դրանից հետո հայտնի է դարձել, որ Կիևն իր կողմնակիցների հետ կփորձի համանման փաստաթուղթն անցկացնել Գլխավոր ասամբլեայում, որտեղ որոշում ընդունելու համար բավարար է 193 անդամ երկրների ձայների պարզ մեծամասնությունը: Կիևի նոր իշխանությունների կողմնակիցները կանխապահովել են Գլխավոր ասամբլեայի երկրների մեծամասնության աջակցությունը. «Բանաձևի ընդունմանը ոչինչ չպետք է խանգ արի»: ԳԱ-ի բանաձևերը, ի տարբերություն ՄԱԿ-ի ԱԽ-ի որոշումների, պարտադիր չեն կատարման համար և բացառապես հանձնարարական բնույթ են կրում: