Ժնևի քննարկումներում սկզբունքային հարցերը մնում են չուծված. ՌԴ ԱԳՆ

Ինչպես հայտնում է itar-tass-ը, Անդրկովկասի անվտանգության ու կայունության ապահովման շուրջ քննարկումների 27-րդ փուլում հաջողվել է փոքր-ինչ առաջ շարժվել ընդհանուր հայտարարության մշակման ճանապարհին, բայց սկզբունքային հարցերը մնում են չուծված: Այդ մասին հայտնել է Ռուսաստանի արտաքին գործերի փոխնախարար Գրիգորի Կարասինը՝ ամփոփելով մարտի 26-ին Ժնևում կայացած կոնսուլտացիաների հերթական փուլի արդյունքները:

Քննարկումներն ընթանում են ՄԱԿ-ի, Եվրամիության և Եվրոպայի անվտանգության և համագործակցության կազմակերպության հովանու ներքո:

Դրանց մասնակցում են Աբխազիայի, Վրաստանի, Ռուսաստանի, ԱՄՆ-ի և Հարավային Օսիայի պատվիրակությունները:

Տարաձայնությունների թվում նա նշել է «Աբխազիայի և Հարավային Օսիայի գոյության ընդունումը և փաստաթղթում դրան հղում անելը», ինչին դեմ է Թբիլիսին: Մինչդեռ, ինչպես ընդգծել է Կարասինը, առանց նման հղումների անհասկանալի կլինի՝ «ովքեր են ընդունում համատեղ հայտարարությունը»:

Պահպանվում է նաև ուժ չկիրառելու Ռուսաստանի միակողմանի պարտավորության վերաբերյալ Վրաստանի ավանդական պահանջը: «Մենք մեզ հակամարտության կողմ չենք համարում, ուստի մտադիր չենք նման հայտարարություններ անել»,-նշել է Ռուսաստանի պատվիրակության ղեկավարը:

«Հույս է հայտնվել, որ ապագա փուլերում ձևակերպումների վերաբերյալ կգտնվի այնպիսի որոշում, որը կբավարարի բոլորին»,-նշել է դիվանագետը:

Անդրկովկասի անվտանգության և կայունության հարցերի շուրջ քննարկումներն անցկացվում են արդեն հինգուկես տարի այն պայմանավորվածությունների հիման վրա, որոնք Ռուսաստանի և Ֆրանսիայի նախագահների միջև ձեռք են բերվել 2008 թվականի օգոստոսին Հարավային Օսիայում տեղի ունեցած ողբերգական իրադարձություններից հետո: Քննարկումների հաջորդ փուլը պլանավորված է հունիսի 17-18-ին: