Օբամայի վարկանիշը ռեկորդային անկում է ապրել

Ինչպես հայտնում է ria.ru-ն, ԱՄՆ-ի նախագահ Բարաք Օբամայի գործունեությանը հավանություն չտվող ամերիկացիների թիվը հասել է 59 տոկոսի՝ սահմանելով հերթական հակառեկորդը: Այդ մասին վկայում են GfK ընկերության հարցման տվյալները, որն անցկացվել է «Ասոշիեյթեդ Պրես» լրատվական գործակալության պատվերով:

Օբամայի հակավարկանիշը կայունորեն աճել է 2012 թվականի վերջից, հունվարին Օբամայի գործունեությանը հավանություն չէր տալիս ամերիկացիների 53 տոկոսը՝ 5 տոկոսով պակաս, քան նախորդ ամսին:

Մարտյան հարցման արդյունքները վկայում են վարկանիշի կտրուկ անկման մասին: Ամերիկացիների միայն 39 տոկոսն է հավանություն տալիս իր նախագահի գործունեությանն այն դեպքում, երբ նրա քաղաքականությանը համաձայն չէ 59 տոկոսը: Առավել լայն քննադատություն է հարուցում Սպիտակ տան միջազգային քաղաքականությունը: Մյուս երկրների նկատմամբ Օբամայի քաղաքականությանը հավանություն չտվող քաղաքացիների թիվը հունվարից ի վեր աճել է 10 տոկոսային կետով՝ մինչև 58 տոկոս:

Աշխարհում հիմնական թեման Ուկրաինայի իրադարձություններ են: Հարցման տվյալների համաձայն՝ ամերիկացիների 57 տոկոսը հավանություն չի տալիս այդ երկրի նկատմամբ Օբամայի քաղաքականությանը: Հարցման ընթացքում արծարծվել են նաև Ռուսաստանի և ԱՄՆ-ի հարաբերությունները Ուկրաինայի իրադարձությունների համատեքստում. հարցվածների մեծամասնությունը (54 տոկոսը) համաձայն չէ Օբամայի գործողությունների հետ:

ԱՄՆ-ի նախագահի արտաքին քաղաքականությունը, ամբողջությամբ վերցված, մշտապես դառնում է հասարակայնության քննադատության օբյեկտ: Այսպես, Օբամայի ընդդիմախոսներն անցյալ տարի ԱՄՆ-ի արտաքին քաղաքականության ձախողում էին համարում Սիրիայի շուրջ ծավալված իրադարձությունները, ԱՄՆ-ի հատուկ ծառայությունների նախկին աշխատակից Էդվարդ Սնոուդենի մերկացումները:

Նախօրյակին ԱՄՆ-ի պաշտպանության նախկին նախարար Դոնալդ Ռամսֆելդը հանդես է եկել հայտարարությամբ և նշել, որ Օբամայի վարչակազմը չկարողացավ Աֆղանստանի հետ համաձայնության գալ իր զորքերի կարգավիճակի շուրջ այդ երկրից հիմնական զորակազմի դուրսբերումից հետո այն դեպքում, երբ դա կարող էր անել նույնիսկ «վարժեցված կապիկը»:

Մարտի 20-ից մինչև 24-ն անցկացված հարցմանը մասնակցել է ավելի քան հազար մարդ: Վիճակագրական անհամապատասխանությունը չի գերազանցում 3,4 տոկոսը: