Պուտինի վարկանիշը նոր առավելագույն ցուցանիշ է արձանագրել՝ 82,3 տոկոս. ՀԿՈւՀ

Ինչպես հայտնում է itar-tass-ը, ՌԴ նախագահ Վլադիմիր Պուտինի գործունեությանը հավանության վարկանիշը մարտի վերջին հասել է նոր առավելագույնի՝ 82,3 տոկոսի: Այդ մասին վկայում են Հասարակական կարծիքի ուսումնասիրման համառուսաստանյան կենտրոնի (ՀԿՈւՀԿ) կողմից անցկացված հարցման տվյալները:

Սոցիոլոգները նշում են, որ նախագահի աշխատանքին հավանության այսչափ բարձր մակարդակը գրանցվել է, առաջին հերթին, Ռուսաստանի Դաշնության կազմ Ղրիմի մտնելու և Ուկրաինայում ստեղծված բարդ իրավիճակի կապակցությամբ (այդ իրադարձություններն անցած շաբաթ գլխավորն են համարել հարցման մասնակիցների 71 տոկոսը):

ՌԴ-ի նախագահի գործունեությանը հավանության ցուցանիշը շարունակում է աճել երկրորդ ամիսն անընդմեջ: Վերջին շաբաթվա ընթացքում, ՀԿՈւՀԿ-ի հարցումների համաձայն, Պուտինի վարկանիշը 75,7 տոկոսից հասել է 82,3 տոկոսի, իսկ տարեսկզբից աճել է մեկ քառորդով (հունվարի 60,6 տոկոսից մարտին հասել է 74,4 տոկոսի): Այսպիսով, ինչպես նշում են հասարակական կարծիքի ուսումնասիրման կենտրոնում, այդ ցուցանիշն զգալիորեն մոտեցել է վեցամյա վաղեմության մեծությանը, որը 2008 թվականի փետրվարին կազմում էր 82,9 տոկոս:

ՀԿՈւՀԿ-ի համառուսաստանյան հարցումն անցկացվել է 2014 թվականի մարտի 22-23-ին: Հարցմանը մասնակցել են Ռուսաստանի 42 հանրապետությունների, երկրամասերի ու մարզերի 130 բնակավայրերի 1600 բնակիչներ: