«Աջ հատվածը» Ուկրաինայի Գերագույն ռադայի մոտ կշարունակի պահանջել Ավակովի պաշտոնաթողությունը

«Աջ հատվածը» մարտի 28-ին Ուկրաինայի Գերագույն ռադայի մոտ կշարունակի ակցիան՝ երկրի ներքին գործերի նախարար Արսեն Ավակովի պաշտոնաթողության պահանջով:

«Սա ակցիա է մի մարդու դեմ, որն այսօր չի կարող իրականացնել իր պաշտոնեական լիազորությունները, քանի որ չի վերահսկում իր ստորադրյալներին»,-հայտնել է «Աջ հատվածի» ղեկավարներից մեկը՝ Անդրեյ Բոնդարենկոն, ուկրաինական «Շուստեր Live» թոք-շոուի ուղիղ եթերում կայացած հեռախոսային միացման ժամանակ:

Մինչդեռ Ավակովը հայտարարում է, որ ՆԳ նախարարությունն առաջիկա երկու օրը կհրապարակի այն աուդիոֆայլերը, որոնք առնչություն ունեն Արևմտյան Ուկրաինայում «Աջ հատվածի» համակարգող Ալեքսանդր Մուզիչկոյի, ով հայտնի է նաև որպես Սաշա Բելի, ձերբակալման փորձի և զոհվելու հետ:

«ՆԳ նախարարությունը կհրապարակի բոլոր փաստաթղթերը, իրեղեն ապացույցները, տեսագրված և ձայնագրված փաստերը: Առաջիկա մեկ-երկու օրը ՆԳՆ-ն կհանի գործով աուդիոֆայլերի բոլոր սահմանափակող գրիֆները և կհրապարակի դրանք: Դա հասարակայնությանն ավելի շատ տեղեկատվություն կտա գործի ֆիգուրանտների գործունեության վերաբերյալ: Յուրաքանչյուրը կկարողանա ինքը որոշել, թե ով է հերոս, իսկ ով՝ գռեհիկ ավազակ»,- մարտի լույս 28-ի գիշերը գրել է Արսեն Ավակովը Facebook-ի իր էջում: