ԱՄՆ կոնգրեսականներ Շիֆը և Շերմանը դատապարտել են հարձակումները Քեսաբի վրա

ԱՄՆ կոնգրեսականներ Ադամ Շիֆը և Բրեդ Շերմանը մարտի 27-ին հանդես են եկել Սիրիայի հայաշատ Քեսաբի վրա «Ալ Քաիդա» ահաբեկչական խմբավորմանն առընթեր ծայրահեղական իսլամիստների հարձակումները դատապարտող հայտարարությամբ:

«Հարձակումները, որոնք, ըստ հաղորդված տեղեկատվության, սկսվել են Թուրքիայում, ցույց են տալիս, թե ինչ մակարդակի է հասել անկայուն իրավիճակը Սիրիայում: Ես կապվել եմ Պետդեպարտամենտի պաշտոնյաների հետ, ովքեր վստահեցրին, որ խորհրդակցում են հայ, սիրիացի և թուրք պաշտոնյաների հետ' վերջին իրադարձությունների մանրամասները պարզելու և նման բռնարարքների կրկնությունը կանխելու համար»,-ասել է կոնգրեսական Ադամ Շիֆը' հավելելով, որ տարբեր ուղղություններով աշխատանքներ են տարվում Սիրիայի քրիստոնյաներին մարդասիրական օգնություն ապահովելու նպատակով:

«Ինձ խորապես մտահոգում է Սիրիայի Քեսաբ ավանում ստեղծված զարհուրելի իրավիճակը: Ծայրահեղական ուժերը հատել են Թուրքիայի սահմանը և անցել Քեսաբ. տարածաշրջան, որ գլխավորապես բնակեցված է հայերով: Լուրեր են ստացվել, որ Քեսաբ մտած ուժերն ապականում են եկեղեցիները, թալանում հայերի տները: Ես կապվել եմ Պետդեպարտամենտի հետ և կոչ արել ձեռնարկել բոլոր անհրաժեշտ միջոցառումները` օգնելու սիրիայի հայությանը: Թուրքիան պետք է անհապաղ քայլեր ձեռնարկի օգնելու կանխել ծայրահեղականնների հարձակումները հայ քաղաքացիների վրա»,- նշել է Ներկայացուցիչների պալատի անդամ Բրեդ Շերմանը:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումն սկսվել է մարտի 21-ին Թուրքիայի սահմանի ութ կետերից: Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում: Տեղի Հայկական շտապօգնության մարմինը Սիրիայի Կարմիր մահիկի կազմակերպության հետ բնակիչներին ապահովել է անհրաժեշտ պարագաներով և սնունդով: Մինչև 1947թ. ներգաղթը Քեսաբի շրջանը եղել է ամբողջովին հայաբնակ։ Դրանից հետո Քեսաբի բնակչության պատկերն սկսել է փոփոխվել։ Քեսաբցիների' Հայաստան ներգաղթին զուգահեռ այնտեղ սկսել են հաստատվել օտարազգիները։