Միջազգային հանրությունն անհանգստացած է Թուրքիայում YouTube-ի արգելափակմամբ

Թուրքիայում YouTube տեսահոսթինգի արգելափակումը լրջորեն անհանգստացրել է միջազգային տարբեր կառույցների և պետությունների: Նոր սահմանափակման վերաբերյալ իրենց դժգոհությունն են հայտնել ԵՄ-ն և ԱՄՆ-ն: Այս մասին տեղեկացնում է թուրքական «Հուրիեթ» պարբերականը:

ԵՄ ընդլայնման և հարևանության հարցերով պատասխանատու Շտեֆան Ֆյուլեն կատարվածի առնչությամբ Twitter-ի իր միկրոբլոգում գրառում է կատարել թուրքերեն' նշելով. «Թվիթեր, YouTube. Թուրքիան սա մինչև ո՞ւր է հասցնելու: Պետք է հարգվի տեղեկատվությունը կիսելու ազատությունը, սահմանափակումները պետք է չափավոր լինեն»:

Իր հերթին կատարվածի առնչությամբ հայտարարություն է արել ԱՄՆ պետքարտուղարության խոսնակ Մարի Հարֆը: «Մենք թուրքական կառավարությանը կոչ ենք անում չարգելափակել Twitter-ի, իսկ այժմ էլ YouTube-ի հասանելիությունը»,- ասել է նա:

Թուրքիայում YouTube-ն արգելափակվել է այն բանից հետո, ինչ համացանցում հայտնվել են Թուրքիայի արտաքին գործերի նախարար Ահմեդ Դավութօղլուի, նրա օգնական Ֆերիդուն Սինիրլիօղլուի, Ազգային հետախուզության ծառայության պետ Հաքան Ֆիդանի և Զինված ուժերի գլխավոր շտաբի երկրորդ պետ Յաշար Գյուլերի միջև Սիրիայում պատերազմ հրահրելու հնարավորության մասին խոսակցության գաղտնի երկու ձայնագրություն: Ձայնագրության մեջ Հաքան Ֆիդանը նշում է, որ հարկ եղած դեպքում ինքը 4 մարդ կուղարկի Սիրիա, այնտեղից նրանք 8 հրթիռ կարձակեն Թուրքիայի տարածք, ինչով էլ Սիրիայի դեմ պատերազմ սկսելու հիմք կստեղծվի: Դավութօղլուն հավելում է, թե «պետք է հարձակվեինք 2012-ին, պետք է համարձակ ո րոշումներ ընդունեինք. ափսոս, որ Սիրիա չմտանք»: Այնուհետև թուրք գլխավոր հետախույզը հայտնում է, որ իրենք «մոտ 2 հազար բեռնատար զենք են ուղարկել Սիրիա»: Դրան հակադարձում է Յաշար Գյուլերը' նշելով, որ «այնտեղ ոչ թե զենքի, այլ զինամթերքի կարիք կա»: