Հայաստանն ավարտում է ՄՄ «Ճանապարհային քարտեզով» նախատեսված միջոցառումները. փոխարտգործնախարար

Եվրասիական ինտեգրման ուղղությամբ ծավալվում են չափազանց արագ զարգացումներ, որոնք պատկերացնելու համար անհրաժեշտ է անդրադառնալ դրա ակունքներին՝ ԱՊՀ-ին: Սակայն ԱՊՀ-ն հնարավորություն չի տալիս հետևողական քաղաքականություն վարել պաշտպանական և տնտեսական ոլորտներում, ինչը հանգեցրել է կառույցի անդամների կողմից ՀԱՊԿ-ի ստեղծմանն ու Եվրասիական ինտեգրացիոն գործընթացների ծավալմանը: Հայաստանն արդեն ավարտում է Մաքսային միությանն անդամակցելու «Ճանապարհային քարտեզով» նախատեսված միջոցառումները: Այդ մասին նշեց ՀՀ արտաքին գործերի նախարարի տեղակալ Շավարշ Քոչարյանը՝ «Հայաստան-Մաքսային միություն. հնարավորություններ և մարտահրավերներ» ՀՀԿ երկրորդ տնտեսական համաժողովում:

Քոչարյանը հիշեցրեց, որ 1991 թվականին նախկին խորհրդային հանրապետություներից ձևավորվեց ԱՊՀ-ն, որին միացան 11 երկրներ: «Մենք ունենք մի կազմակերպություն, որը շատ կարևոր դերակատարում ունեցավ հետխորհրդային տարածքում և այսօր էլ շատ հարցերում չափազանց կարևոր է»,- ասաց Քոչարյանը՝ ուշադրություն հրավիրելով կազմակերպության առանձնահատկության վրա, որը լիբերալ է և ցանկացած պետություն կարող է չմիանալ ԱՊՀ-ին: «Բնական է, որ այդպիսի մոտեցման դեպքում ավելի լուրջ, հետևողական քաղաքականություն վարելը' լինի դա պաշտպանության ոլորտում, լինի դա տնտեսության մեջ, չափազանց դժվար է, եթե չասեմ անհնարին»,- նշեց Քոչարյանը՝ հավելելով, որ ԱՊՀ երկրների կողմից ստեղծվեց Հավաքական անվտանգության պայմանագրի կազմակերպությունը, որը լրջագույն դերակատարություն ունի ԱՊՀ երկրների համար: 

Երկրորդ ուղղությունը վերաբերում է տնտեսական դաշտին: «Տնտեսական դաշտում առաջին փորձը ԵվրԱզԷՍ-ն էր, որտեղ Հայաստանը հանդիսանում է դիտորդ՝ հենց այն պատճառով, որ ժամանակին չափազանցվում էր այն անհնարինությունը, որը տալիս է ընդհանուր սահմանի բացակայությունը նմանատիպ կազմակերպություններին անդամակցելու համար»,- նշեց Քոչարյանը՝ հավելելով, որ դրա հիման վրա ներկայում տեղի են ունենում նոր գործընթացներ՝ Մաքսային միության և ընդհանուր տնտեսական տարածքի ձևավորում: «Այսօր իր «Ճանապահային քարտեզով» Հայաստանի Հանրապետությունը միանալու է այդ երկու կառույցներին, այսինքն մեկ կառույցի՝ Մաքսային միությանը և Ընդհանուր տնտեսական տարածքին»,- ասաց փոխարտգործնախարարը՝ հավելելով, որ մայիսին շատ հնարավոր է ստորագրվի Եվրասիական միության պայմանագիրը, որը պետք գործի 2015 թ. հունվարի մեկից:

Քոչարյանը հայտնեց, որ «Ճանապարհային քարտեզով» նախատեսված քայլերը մոտենում են ավարտին և նշված կառույցներին միանալուց հետո սպասվում է Ազգային ժողովի, կառավարության և բիզնես միջավայրի, ՀԿ-ների մեծ աշխատանք:

Մարտի 29-ին Երևանում մեկնարկեց «Հայաստան-Մաքսային Միություն. հնարավորություններ և մարտահրավերներ» խորագրով ՀՀԿ երկրորդ տնտեսական համաժողովը։ Համաժողովին զեկույցներով հանդես եկան ՀՀ վարչապետ Տիգրան Սարգսյանը, Եվրասիական տնտեսական հանձնաժողովի կոլեգիայի անդամ Տատյանա Վալովայան, ՀՀ ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը, ՀՀ էկոնոմիկայի նախարարի առաջին տեղակալ Կարինե Մինասյանը, ՀՀ արտաքին գործերի նախարարի տեղակալ Շավարշ Քոչարյանը: