Ամերիկացին խաբեության զոհ է դարձել՝ մեքենա գնելիս կորցնելով ավելի քան 77 հազար դոլար

ԱՄՆ Հյուսիսային Կարոլինայի բնակիչը կորցրել է ավելի քան 77 հազար դոլար՝ փորձելով ձեռք բերել Lexus GX 550 մակնիշի ավտոմեքենա։ Այս մասին հայտնում է Carscoops-ը՝ նշելով, որ նա դարձել է խաբեության զոհ։

Հրապարակման համաձայն՝ հանցագործները կիրառել են արհեստական բանականության տեխնոլոգիաներ՝ ստեղծելով պաշտոնական դիլերի կայքի գրեթե ամբողջական պատճեն և համոզելով գնորդին գործարքի իրական լինելու մեջ։ Տուժածը շուրջ տասը օր շփվել է անձի հետ, ով ներկայացել է որպես T&T Vehicle Sales ընկերության աշխատակից, ստացել է մեքենայի լուսանկարներ, տեխնիկական տվյալներ և տարբեր «ապացույցներ»։ Սակայն գումարը փոխանցելուց անմիջապես հետո կապը ընդհատվել է։

Մասնագետների խոսքով՝ նման խարդախությունները ԱՄՆ-ում դարձել են ավելի հաճախակի։ Կեղծ կայքերը հաճախ ամբողջությամբ կրկնում են իրական դիլերների էջերը՝ ներառյալ մեքենաների ցանկը և աշխատակիցների տվյալները։ Փորձագետները խորհուրդ են տալիս գործարքներից առաջ պարտադիր կապ հաստատել ընկերության պաշտոնական համարներով, ստուգել կայքի հասցեն և զգուշանալ, եթե պահանջվում է արագ կանխավճար կատարել։