Քերին և Լավրովը հանդիպման ընթացքում որևէ հստակ պայմանավորվածություն ձեռք չեն բերել

ԱՄՆ պետքարտուղար Ջոնի Քերին և ՌԴ արտգործնախարար Սերգեյ Լավրովը քննարկել են Ուկրաինայի կայունացման վերաբերյալ համատեղ աշխատանքների հնարավոր ծրագրերը: Այս մասին հայտնում է ria.ru-ն:

Պետքարտուղարն իր հերթին հասկացրել է, որ որևէ հստակ պայմանավորվածություն կամ որոշում չի կայացվել հանդիպման ընթացքում, սակայն այն եղել է կառուցողական  և ակնկալվում է քննարկում-հանդիպման շարունակություն: Նշվում է նաև, որ Լավրովն ու Քերին տարբեր կարծիքներ են հնչեցրել ճգնաժամի առաջացման և դրա սրացման գործոնների մասին: 

«Մենք պայմանավորվեցինք աշխատել Ուկրաինայի կառավարության հետ, որպեսզի հասնենք այնպիսի առաջնային միջոցառումների իրականացմանը, ինչպիսիք են ազգային փոքրամասնությունների իրավունքների, լեզվական իրավունքների ապահովումը, սադրիչների զինաթափումը, սահմանադրական բարեփոխման իրականացումը և ազատ ու արդար ընտրությունների անցկացումը միջազգային անաչառ հսկողության ներքո»,- նշել է Լավրովը:

ԱՄՆ պետքարտուղար Ջոն Քերին ՌԴ ԱԳ նախարար Սերգեյ Լավրովի հետ հանդիպումից հետո հայտնել է, որ հանդիպման ընթացքում քննարկվել է նաև Ուկրաինայի ֆեդերալիզացման հարցը՝  ընդգծելով, որ այդ մասին որոշում պետք է կայացնի Ուկրաինան:

Հանդիպումից հետո Լավրովն ասել է, որ Ուկրաինայի նոր իշխանությունները երկրի բոլոր շրջաններին պետք է առաջարկեն մասնակցել սահմանադրական բարեփոխումներին, իսկ Ռուսաստանը և ԱՄՆ-ն կխրախուսեն երկխոսությունը՝ առանց Կիևին ինչ-որ բան պարտադրելու: