Տիմոշենկոն լավ կաներ` հաներ իր թեկնածությունը և աջակցեր Պորոշենկոյին. Կլիչկո

Ինչպես հայտնում է "Укринформ"-ը, ՈւԴԱՌ կուսակցության նախագահ Վիտալի Կլիչկոն խորհուրդ է տալիս «Բատկիվշչինայի» ղեկավար Յուլյա Տիմոշենկոյին նույնպես հանել իր թեկնածությունն Ուկրաինայի նախագահի ընտրություններում և աջակցել Պյոտր Պորոշենկոյին: Այդ մասին Կլիչկոն  գրել է «Յուլյա Տիմոշենկոն իր թեկնածությունը չպետք է առաջադրի» հոդվածում, որը մարտի 31-ին հրապարակվել է գերմանական Bild թերթում:

«Յուլյա Տիմոշենկոն ավելի լավ կաներ, եթե նույնպես պատասխանատվություն ստանձներ և աջակցեր Պորոշենկոյին»,-ասել է Կլիչկոն:

Ինչպես ընդգծել է քաղաքական գործիչը, «Ուկրաինայի բոլոր ժողովրդավարական ուժերը նախագահական ընտրությունների պետք է գնան միասնական թեկնածուով, որպեսզի չխորացնեն երկրի պառակտումը»:

Ինչպես արդեն հաղորդվել է, Ուկրաինայի Կենտրոնական ընտրական հանձնաժողովը փաստաթղթեր և 2,5 մլն գրիվնայի (մոտավորապես 233 հազար դոլար) չափով դրամական գրավ է ընդունել 24 մարդուց, որոնք հավակնում են երկրի նախագահի պաշտոնին: 

Փաստաթղթերի ընդունումն ավարտվել է լույս մարտի 31-ի կեսգիշերին: ԿԸՀ-ի մամուլի ծառայության տվյալներով՝ երկրի նախագահի թեկնածուի պաշտոնական կարգավիճակ է ստացել արդեն յոթ մարդ՝ նախկին փոխվարչապետներ Յուրի Բոյկոն և Սերգեյ Տիգիպկոն, Խարկովի մարզի նախկին նահանգապետ Միխայիլ Դոբկինը, գլխավոր դատախազի նախկին տեղակալ Ռենատ Կուզմինը, գործարար Վադիմ Ռաբինովիչը, Գերագույն ռադայի նախկին պատգամավոր Վալերի Կոնովալյուկը և «Ինտերագրոէքսպորտ» ընկերության ղեկավար Վլադիմիր Սարանովը:

Խորհրդարանական չորս խմբակցություններ՝ «Բատկիվշչինան», ՈՒԴԱՌ-ը, «Ազատությունը» և Ռեգիոնների կուսակցությունը, մարտի 29-ին անցկացրել են համագումարներ, որոնց ընթացքում առաջադրվել են նախագահի թեկնածուներ: Ինչպես և սպասվում էր, «Բատկիվշչինան» պետության բարձրագույն պաշտոնի թեկնածու է առաջադրել կուսակցության առաջնորդ Յուլյա Տիմոշենկոյին, «Ազատությունը»՝ իր ղեկավար Օլեգ Տյագնիբոկին: Ռեգիոնների կուսակցությունը մի քանի հավակնորդներից կանգ է առել Դոբկինի թեկնածության վրա: ՈՒԴԱՌ-ի առաջնորդ Վիտալի Կլիչկոն, ով ավելի «վաղ առաջինն էր հայտարարել իր նախագահական հավակնությունների մասին, հրաժարվել է նախկին պլաններից՝ որոշելով պաշտպանել խորհրդարանի պատգամավոր օլիգարխ Պյոտր Պորոշենկոյին, որը նախագահական մրցավազքը կսկսի որպես ինքնաառաջադրված թեկնածու: