Յանուկովիչը Ղրիմի անջատումն Ուկրաինայից անվանել է ողբերգություն

Ղրիմի առանձնանալն Ոուկրաինայից երկրի նոր իշխանությունների մեղավորությունն է, իսկ Ռուսաստանն ու Յանուկովիչը դրա հետ ոչ մի առնչություն չունեն: Դոնի Ռոստովում ընթացող մամուլի ասուլիսի ժամանակ Ուկրաինայի նախկին նախագահ Վիկտոր Յանուկովիչը նաև նշել է, որ, իր գնահատմամբ' Ղրիմում տեղի ունեցած հանրաքվեն իր տեսակով բողոքի նշան էր, որը տեղացիները ցույց տվեցին նոր իշխանությունների հանդեպ: «Եթե ես լինեի, ես ամեն ինչ կանեի, որ թերակղզին չանջատվեր երկրից»,- հայտարարել է Յանուկովիչը:

Նա կոչ է արել Եվրոպային դրսևորել աչալրջություն, քանի որ «երկրի Գերագույն ռադայում հանցագործներ են», ովքեր ընդունում են օրենքներ: «Այս պարագայում ինչ ժողովրդավարության մասին կարող է խոսք գնալ»,- հայտարարել է Յանուկովիչը: Նախկին նախագահի գնահատմամբ' զինված ծայրահեղականները ուշադրություն չեն դարձնում ոչ իշխանության, ոչ էլ ընդդիմության տեսակետերին: Նա անթույլատրելի է համարել հանցագործների, ազգայնականների եւ ծայրահեղականների մուտքը քաղաքականություն:

Մամուլի ասուլիսի ժամանակ Յոնւկովիչը հավաստիացրել է, որ չի ընդունում, երբ հանուն իշխանության պահպանման արյուն է թափվում: «Իմ ձեռքը չէր բարձրանա ծայրահեղ որոշումներ կայացնել Մայդանի առնչությամբ: Դա հակասում է իմ սկզբունքներին: Չարժե իշխանության պահպանման համար գեթ մեկ կաթիլ արյուն թափել», ասել է նա:

Մարտի 16-ին Ղրիմում կայացած հանրաքվեի արդյունքում բնակիչների 96 տոկոսը կողմ է քվեարկել ՌԴ-ի հետ միավորմանը: Մարտի 17-ին ՌԴ նախագահ Վլադիմիր Պուտինը ստորագրել է հրամանագիր և ճանաչել Ղրիմի անկախությունը: Իսկ մարտի 18-ին ստորագրվել է Ղրիմի և Սեւաստոպոլ քաղաքի' ՌԴ կազմ մտնելու միջազգային համաձայնագիրը: Միջազգային հանրությունը չի ճանաչում Ղրիմի հանրաքվեի արդյունքներն ու որոշակի պատժամիջոցներ է կիրառում Ռուսաստանի դեմ: