Ուկրաինայում ԵԱՀԿ-ի դիտորդական առաքելության ղեկավար է նշանակվել ՄԱԿ-ին առընթեր Թուրքիայի նախկին մշտական ներկայացուցիչը

Եվրոպայի անվտանգության և համագործակցության կազմակերպությունը նախագահող Շվեյցարիան Ուկրաինայում հատուկ դիտորդական առաքելության ղեկավարություն է նշանակել: Կազմակերպության կայքում հրապարակված հայտարարության համաձայն՝ պատվիրակությունը կգլխավորի Էրթոգյուլ Ապականը, ով 2009-2012 թվականներին ՄԱԿ-ին առընթեր Թուրքիայի մշտական ներկայացուցիչն էր:

ԵԱՀԿ-ի գործող նախագահ, Շվեյցարիայի արտաքին գործերի նախարար Դիդիե Բուրկհալտերը նշանակել է նաև առաքելության ղեկավարի երկու տեղակալներին: Նրանք են՝ Մարկ Էթերինգթոնը Մեծ Բրիտանիայից, որը միջազգային առաքելությունները ղեկավարելու փորձ ունի, և Շվեյցարիայից Ալեքսանդր Հուգը, որը ներկայումս ԵԱՀԿ-ի ներկայացուցչի գրասենյակում զբաղեցնում է ազգային փոքրամասնությունների իրավունքների հարցերով ավագ խորհրդականի պաշտոնը:

Դիտորդների հատուկ առաքելության մանդատը ԵԱՀԿ-ի բոլոր երկրների կողմից համաձայնեցվել է մարտի 21-ին:

ԵԱՀԿ-ի հակամարտությունների կանխման կենտրոնի ղեկավար Ադամ Կոբերացկին նախօրյակին հայտնել է, որ Ուկրաինայում Եվրակազմակերպության դիտորդական առաքելությունը կարող է 100-ից ընդլայնվել մինչև 500 հոգի: «Սկզբնապես պատվիրակության կազմը բաղկացած է 100 մարդուց: Մենք հնարավորություն ունենք այս պատվիրակությունն ընդլայնելու մինչև 500: Մենք ցանկանում ենք, ամենից առաջ, հնարավորինս արագ տեղաբաշխել դիտորդներին: Երբ նրանք սկսեն աշխատել, մենք պատրաստ ենք մեկ-երկու շաբաթ հետո ընդլայնելու այդ պատվիրակությունը»,- ասել է Կոբերացկին:

Նրա խոսքով՝ արդեն Խարկով է ժամանել երկու դիտորդ, ևս ութը պետք է ժամանեն օրվա ընթացքում: Կոբերացկին ընդգծել է, որ խոսքը վերաբերում է ոչ թե զինվորական, այլ քաղաքացիական դիտորդներին, որոնց նպատակն է առավելագույնս լիակատար տեղեկատվություն ստանալ Ուկրաինայում տեղի ունեցող իրադարձությունների մասին:

Սկզբնապես 10-ական դիտորդներ կաշխատեն Լվովում, Կիևում, Իվանո Ֆրանկովսկում, Չեռնովցիում, Լուգանսկում, Դոնեցկում, Խերսոնում, Օդեսայում, Խարկովում և Դնեպրոպետրովսկում: