118 ուղևորներով ինքնաթիռն արտակարգ վայրէջք է կատարել Նյու Յորքի օդանավակայանում

Delta Air Lines ավիաընկերության ինքնաթիռը հիդրավլիկ համակարգի խնդիրների պատճառով արտակարգ վայրէջք է կատարել Նյու Յորքի Ջոն Քենեիի անվան օդանավակայանում և դուրս եկել թռիչքա-վայրէջքային գոտու սահմաններից: Այդ մասին ապրիլի 3-ին հաղորդել է Reuters գործակալությունը:

Միջադեպը տեղի է ունեցել տեղական ժամանակով ժամը մոտավորապես 21-ին (Երևանի ժամանակով ժամը 06:00-ին): 886-րդ չվերթը՝ 118 ուղևորներով և անձնակազմի հինգ անդամներով, որն Ատլանտայից ուղևորվում էր Նյու Յորքի Լա Գուրադիա օդանավակայան, փոխել է երթուղին այն բանից հետո, երբ օդաչուների խցում ցուցասլաքը նշել է հիդրավլիկ համակարգի խնդիրներ, համակարգ, որը կառավարում է նաև արգելակները:

Ուղևորներից ոչ ոք չի տուժել, նրանք բոլորը դուրս են եկել ինքնաթիռից և հասցվել օդանավակայանի տերմինալ: Մասնագետները պարզում են վթարի ստույգ պատճառը, հաղորդել է ՌԻԱ Նովոստին: