Եվրախորհրդարանը քվեարկել է ԵՄ-ի կողմից Ուկրաինայի համար առևտրական արտոնությունների սահմանման օգտին

Եվրախորհրդարանը (ԵԽ) Բելգիայի մայրաքաղաքում կայացած նիստում քվեարկել է Եվրամիության կողմից Ուկրաինայի համար առևտրական արտոնությունների սահմանման օգտին: Այս մասին հաղորդել է Եվրախորհրդարանի մամուլի ծառայությունը:

Ավելի վաղ համապատասխան առաջարկությանը հավանություն էր տվել միջազգային առևտրի կոմիտեն: Պատգամավորներն առաջարկում են վերացնել այն մաքսատուրքերի 98 տոկոսը, որոնք ուկրաինացի արտահանողները վճարում են Եվրամիության սահմաններին: Եվրամիությունում սպասում են, որ այս միակողմանի միջոցառումը կխթանի Ուկրաինայի տնտեսության աճին՝ նրա արտադրողների և արտահանողների համար պահպանելով տարեկան մինչև 487 միլիոն դոլար:

Եվրամիության արտաքին գործերի և անվտանգության քաղաքականության գերագույն ներկայացուցիչ Քեթրին Էշթոնը մարտ ամսին հայտարարել էր, որ ԵՄ-ն արդեն մի քանի շաբաթ հետո կսկսի առևտրական արտոնություններ սահմանել Ուկրաինայի համար: Խոսքը վերաբերում է մաքսերի վերացմանը, մասնավորապես, ուկրաինական գյուղատնտեսական ապրանքների և տեքստիլ արդյունաբերության արտադրանքի համար: Սույն արտոնությունները կգործեն, առնվազն, մինչև նոյեմբերի 1-ը, հաղորդել է ԻՏԱՌ-ՏԱՍՍ-ը: