Կորած Boeing 777-200 ավիահանրանավի որոնման գործողությունը մտել է ստորջրյա փուլ

Մարտ ամսվա սկզբին Հնդկական օվկիանոսում կորած մալայզիական ավիահանրանավի հայտնաբերման միջազգային գործողության մասնակիցներն ապրիլի 4-ին սկսում են ինքնաթիռի «սև արկղերի» ստորջրյա որոնումները: Այս մասին տեղեկացնում է ria.ru-ն՝ վկայակոչելով CNN հեռուստաալիքը:

Ըստ Ավստրալիայում բազավորված՝ որոնումների համակարգող կենտրոնի տվյալների՝ ընդամենը գործողությանը մասնակցում են 14 ինքնաթիռ և ինը նավ: Հնդկական օվկիանոսի հարավում որոնումների տարածությունը կազմում է 217 հազար քառակուսի կիլոմետր:

Գործողությանը կօժանդակեն Մեծ Բրիտանիայի ռազմածովային ուժերի Echo հիդրոգրաֆիական նավը և ավստրալական Ocean Shield ծովային փոխադրանավը: Ինքնաթիռի ինքնագրիչների ստորջրյա որոնումներն սկսվում են կրիտիկական պահի. դրանց կուտակիչները կլիցքաթափվեն և ազդանշանային փարոսիկներին առանց սնուցման կթողնեն ավիաաղետից մոտավորապես 30 օր անց, որը տեղի է ունեցել մարտի լույս 8-ի գիշերը:

Հաղորդվում է, որ ավստրալիական Ocean Shield-ը հանդերձված է TPL-25 վիթխարի ստորջրյա միկրոֆոնով և Bluefin-21 ստորջրյա ռոբոտով, որը կարող է որոնողական աշխատանքներ կատարել օվկիանոսի հատակին:

Boeing 777-200 ավիահանրանավը կատարում էր MH370 չվերթը Քուալա Լումպուրից Պեկին՝ 227 ուղևորներով և անձնակազմի 12 անդամով: Այն բանից 16 օր անց, երբ ինքնաթիռն անհետացավ ռադարների էկրաններից, Մալայզիայի վարչապետ Նաջիբ Ռազաքը հայտնել է, որ օդանավն ընկել է Հնդկական օվկիանոսի հարավային մասում. այս մասին է վկայել արբանյակային տվյալների վերլուծությունը: Ենթադրվում է, որ ոչ ոք ողջ չի մնացել: