ԱՊՀ-ն ապրում է, նրան մահ չի սպառնում. ՌԴ ԱԳՆ

Ինչպես հայտնում է ria.ru-ն, ԱՊՀ-ին տնտեսական պատճառներով տրոհում չի սպառնում, ընդհակառակը, վերջին տարիներին աշխատանքը հիմնականում ընթանում է այդ ուղղությամբ: Այդ մասին ասել է Ռուսաստանի արտաքին գործերի փոխնախարար Վասիլի Նեբենզյան:

Նա թվարկել է տնտեսական ուղղվածության մի քանի պայմանավորվածություններ, որոնք ձեռք են բերվել ԱՊՀ-ում:

«Ուժի մեջ է մտել և գործնականում արդյունավետորեն կիրառվում է ԱՊՀ-ի շրջանակներում ազատ առևտրի գոտու պայմանագիրը: Վերջերս համաձայնագիր է ստորագրվել ինտեգրացված արժութային շուկայի կազմակերպման բնագավառում համագործակցելու մասին, ինչպես նաև համաձայնագիր ազգային տնտեսվարող սուբյեկտների կոնսոլիդացված ֆինանսական հաշվետվության մասին: ԱՊՀ-ի շրջանակներում ստեղծվել և գործում են ճյուղային համագործակցության 70-ից ավելի մարմիններ, դրանց կեսը տնտեսական ուղղվածություն ունի և կարգավորում է համագործակցությունն այնպիսի ոլորտներում, ինչ պիսիք են՝ տրանսպորտը, էներգետիկան, կապը և ուրիշներ»,-ասել է Նեբենզյան:

Բոլոր այդ համաձայնագրերն օբյեկտիվորեն խոսում են այն մասին, որ «ԱՊՀ-ն ապրում է, նրան մահ չի սպառնում»,-հավելել է նա՝ պատասխանելով տնտեսական պատճառներով ԱՊՀ-ի հնարավոր տրոհման վերաբերյալ հարցին:

Անդրադառնալով ԱՊՀ-ից Ուկրաինայի հնարավոր դուրս գալուն՝ ՌԴ փոխարտգործնախարարը նշել է, որ դա կհարվածի նախևառաջ միլիոնավոր ուկրաինացիների, քանի որ այդ դեպքում կդադարեն գործել ԱՊՀ-ի շրջանակներում կնքված մի շարք համաձայնագրեր:

«Պետք է հասկանալ, որ ԱՊՀ-ից դուրս գալը քայլ է, որը ձեռնտու չէ նախևառաջ հենց Ուկրաինային, հատկապես հաշվի առնելով առանց այդ էլ չափազանց բարդ տնտեսական դրությունը, որում գտնվում է այդ երկիրը: Դա, իհարկե, կհարվածի նախևառաջ շարքային քաղաքացիներին, միլիոնավոր ուկրաինացիների: Նախքան նման քայլ անելը, Կիևը պետք է ամեն ինչ ուշադիր կշռադատի: ԱՊՀ-ում կան մի ամբողջ շարք համաձայնագրեր, և Համագործակցությունից դուրս գալը կարող է դադարեցնել դրանց գործողությունը»,-ասել է Նեբենզյան:

Ավելի վաղ Կիևը հայտարարել է, որ հրաժարվում է 2014 թվականին ԱՊՀ-ի հետագա նախագահումից, ինչից հետո նախագահի գործառույթներն ստանձնել է Մինսկը: Ուկրաինայի ազգային անվտանգության և պաշտպանության խորհրդի քարտուղար Անդրեյ Պարուբին հայտարարել է, որ Ուկրաինան մտադիր է նաև հրաժարվել ԱՊՀ-ին անդամակցելուց: