ԵԽԽՎ-ն հատուկ բանաձևով դատապարտելու է Ղրիմի միացումը Ռուսաստանին

Ինչպես հայտնում է itar-tass-ը, Եվրախորհրդի խորհրդարանական վեհաժողովն Ուկրաինայի իրադրության շուրջը շտապ բանավեճերի անցկացման շրջանակներում մտադիր է դատապարտել Ղրիմի միացումը Ռուսաստանին: Այս հարցի քննարկումը վեհաժողովում նախատեսված է ապրիլի 9-ին:

«Վերջին իրադարձություններն Ուկրաինայում. սպառնալիքներ ժողովրդավարական ինստիտուտների գործունեությանը» զեկույցի վերաբերյալ բանաձևի նախագծում ԵԽԽՎ-ն առաջին հերթին ափսոսանք է հայտնում «այն առնչությամբ, որ Ղրիմում տեղի ունեցածն Ուկրաինայում ստվերում է թողնում ժողովրդավարական փոփոխությունները և քաղաքական իրադարձությունները»:

«ԵԽԽՎ-ն վճռականորեն դատապարտում է Ռուսաստանի ռազմական ագրեսիան և դրան հաջորդած՝ Ղրիմի բռնակցումը, ինչը միջազգային իրավունքի նորմաների, այդ թվում՝ ՄԱԿ-ի Կանոնադրության դրույթների, ԵԱՀԿ-ի Հել սինկիի ակտի և Եվրոպայի խորհրդի Կանոնադրության և հիմնական սկզբունքների բացահայտ խախտում է»,- ասված է զեկույցում:

Ռուսաստանի պատվիրակությունը խիստ բողոք է հայտնել բանաձևի այդ նախագծի ընդունման դեմ: «Ուկրաինայի վերաբերյալ ԵԽԽՎ-ի բանաձևի նախագծի քննարկման մոնիթորինգի հանձնաժողովի նիստն սպասելի կերպով վերածվել է Ռուսաստանի, Ղրիմում նրա գործողությունների անզուսպ խայտառակման, պաշտպանության են արժանացել միանգամայն անթույլատրելի հերյուրանքներ: Զեկույցը բնավ ենթակա չէ ուղղման: Այն անհրաժեշտ է պարզապես ամբողջությամբ վերացնել»,- լրագրողներին հայտարարել է պատվիրակության փոխնախագահ, Պետդումայի ԱՊՀ-ի գործերի կոմիտեի նախագահ Լեոնիդ Սլուցկին: