Ռաչինսկին հույս ունի Հայաստանը տեսնել ԵՄ-ի հետ ասոցացված պետություն
Տնտեսություն
Դիվանագիտական առաքելության ավարտին Հայաստանում Լեհաստանի դեսպան Զդիսլավ Ռաչինսկին շեշտում է, որ հինգ տարին համագործակցության ժամանակահատված էր, հաղթանակն ու կարևորագույն ձեռքբերումն այն է, որ որակական փոփոխություն է տեղի ունեցել Հայաստանի և Լեհաստանի հարաբերություններում: «Լեհաստանը Եվրոպայի այն երկիրն է, որի հետ Հայաստանը վերջին հինգ տարում ունեցել է բարձր մակարդակներում և ոլորտներում համագործակցություն: Այս ընթացքում Լեհաստանը Հայաստանի համար ավելի ընկալելի և պարզ դարձավ: Կարևոր հարցերում մեր ունեցած դիրքորոշման նկատմամբ հայերի ըմբռնումը նույնպես իրականություն է»,- «Արմենպրես»-ի փոխանցմամբ, նոյեմբերի 24-ին լրագրողների հետ կայացած հանդիպման ժամանակ ասաց Զդիսլավ Ռաչինսկին:
Հայաստան-ԵՄ հարաբերությունների առնչությամբ դեսպանն ասաց, որ գնահատականներում զգույշ է լինելու: Ռաչինսկին հույս ունի, որ Հայաստանը կդառնա ԵՄ-ի հետ ասոցացված պետություն: «Այդ երկխոսությունը Հայաստանի և ԵՄ-ի միջև շարունակվելու է: Պարզապես պետք է գտնել համագործակցության և երկխոսության նոր ձև: Լեհաստանը ջատագովն է, որ Հայաստանն ու ԵՄ-ն սերտ համագործակցեն միմյանց հետ: Եվրահանձնաժողովը և ԵՄ նորանշանակ նախագահ Դոնալդ Տուսկը, ով հաջորդ շաբաթ կստանձնի իր պարտականությունները, կաշխատեն այն ուղղությամբ, որ ՀՀ-ԵՄ հարաբերությունները լինեն բարձր մակարդակի վրա և համարվեն արտոնյալ: ԵՄ-ի հետ համագործակցության և երկխոսության հարցում Հայաստանը միշտ էլ կարող է ակնկալել Լեհաստանի աջակցությունը»,- ասաց դեսպանը:
Հայաստանում հինգ տարվա դիվանագիտական գործունեությունից հետո Հայաստանում Լեհաստանի դեսպան Զդիսլավ Ռաչինսկին ավարտում է իր առաքելությունն ու վերադառնում Վարշավա:
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
