Լեհաստանն աջակցում է Մինսկի խմբին և խաղաղության հաստատման երեք սկզբունքներին

Լեհաստանը հավատարիմ է այն դիրքորոշմանը, որ Լեռնային Ղարաբաղի հակամարտության կարգավորումը հնարավոր է միայն այն դեպքում, երբ շահագրգիռ կողմերը խաղաղ երկխոսություն ծավալեն: Լեհաստանը շարունակում է աջակցել ԵԱՀԿ Մինսկի խմբին և այն սկզբունքներին, որոնք ենթադրում են խաղաղ լուծում (Հելսինկյան եզրափակիչ ակտի երեք հիմնական սկզբունքները' ուժի և ուժի սպառնալիքի չկիրառում, ազգերի ինքնորոշում և տարածքային ամբողջականություն- խմբ.): Այս մասին հայտարարեց ՀՀ-ում Լեհաստանի արտակարգ և լիազոր դեսպան Զդիսլավ Ռաչինսկին՝ նոյեմբերի 24-ին առաքելության ավարտի կապակցությամբ լրագրողների հետ հանդիպմանը: «Ցանկացած տեսակի լարվածություն, որ կարող է տեղի ունենալ հակամարտող կողմերի շփման գծում, ինչպես նաև ագրեսիվ ռազմական հռետորաբանությունը չեն ծառայում հակամարտության խաղաղ կարգավորմանը, կայունության ապահովմանն ու հետագա լուծմանը: Նույնիսկ Եվրոպայում հարյուրամյա պատերազմն ավարտվեց համաձայնագրով, Հայաստանն ու Ադրբեջանը դատապարտված են խաղաղության, նրանք հարևաններ են և աշխարհագրությունը չեն կարող փոխել: Կարելի է փոխել աշխարհաքաղաքականությունը, իսկ այսօր անհրաժեշտ է դաստիարակել այնպիսի հասարակություն, որ պատրաստ լինի խաղաղության»,- ասաց դեսպանը' հավելելով, որ ԵՄ-ի ստեղծման գաղափարախոսությունը հենց ծնվել է խաղաղության և բանակցության հիմքի վրա:

Դեսպանի գնահատմամբ, հակամարտության կարգավորման այլ ձևաչափ, քան ԵԱՀԿ Մինսկի խումբն է, գոյություն ունենալ չի կարող, սակայն հակամարտող կողմերը պետք է հասկանան, որ չի կարելի գերագնահատել միջնորդների դերը: Ըստ Ռաչինսկու՝ կողմերը պետք է հակամարտության կարգավորման ցանկություն դրսևորեն, իսկ միջնորդների դերը միջնորդությունն ու բանակցության գործընթացի դյուրացումն է:

Լեռնային Ղարաբաղի հակամարտության ռազմական փուլը ծագել է 1991թ., երբ ի պատասխան ԼՂ բնակչության ինքնորոշման պահանջի, ադրբեջանական իշխանությունները փորձեցին հարցը լուծել' խորհրդային անվտանգության ուժերի (ԿԳԲ-ի հատուկ ջոկատներ) կողմից անձնագրային ռեժիմի իրականացման քողի տակ էթնիկ զտումներ իրականացնելով և լայնածավալ ռազմական գործողություններ սկսելու ճանապարհով, որը բերեց հազարավոր զոհերի և զգալի նյութական կորուստների: 1994թ. կնքվեց զինադադար: Ներկայումս հիմնախնդրի կարգավորման շուրջ բանակցությունները ընթանում են ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրան սիա) միջնորդությամբ և նրանց ներկայացրած առաջարկությունների հիման վրա:

Ադրբեջանը մինչ այսօր չի կատարում ՄԱԿ-ի Անվտանգության խորհրդի 1993 թ. 4 բանաձևերը' շարունակելով տարածաշրջանում սպառազինությունների մրցավազքի հրահրումը և կոպտորեն խախտելով միջազգային իրավունքի ուժի և ուժի սպառնալիքի չկիրառման սկզբունքը: