Մենք փոխանցում ենք մեզ հասանելիք դրամական խրախուսանքն ուղղաթիռի անձնակազմի անդամների ընտանիքներին. Արցախի ՊԲ հատուկ ջոկատայիններ

«Ինչպես տեղեկացել ենք հավաստի աղբյուրից, Արցախի իշխանությունները փայլուն գնահատելով հատուկ ջոկատայինների՝ թշնամու կողմից կործանված ուղղաթիռի օդաչուների մարմինները և ուղղաթիռի կարևոր մասերը տարհանելու գործողությունը, դրամական խրախուսանքի են արժանացրել նրանց»,- այս մասին գրում է karabakh-life.am-ը:

Մարտի դաշտում փայլուն հաղթանակին տղաներն ավելացրին ևս մեկը՝ բարոյական հաղթանակ. «Մեզ համար նախատեսած ֆինանսական խրախուսանքը փոխանցում ենք զոհված օդաչուների ընտանքիներին»,- հայտարարել են տղաները:

Հիշեցնենք, որ նոյեմբերի 2014-ի նոյեմբերի 12-ին Արցախում ընթացող «Միասնություն 2014» զորավարժության շրջանակներում ուսումնավարժական թռիչք իրականացնելիս ադրբեջանական կողմը խոցել էր հայկական օդուժի Մի-24 հարվածային ուղղաթիռը։

Ուղղաթիռի ընկած վայրն անցած օրերին Ադրբեջանը պահում էր ինտենսիվ կրակի տակ՝ արհամարհելով միջազգային կառույցների ցանկացած միջնորդություն' օդաչուների մարմինները դուրս բերելու կապակցությամբ:

«Արցախի ՊԲ հատուկ նշանակության ստորաբաժանումն ստիպված դիմել է հատուկ նշանակության գործողության, որի արդյունքում դուրս է բերել հակառկորդի կողմից կործանված ուղղաթիռի անձնակազմից մեկի դին և երկու օդաչուների մասունքները, որոնք կարևոր են ճիշտ հետաքննություն կատարելու համար»,- ասել է Արցախի ՊՆ Մ. Հակոբյանը: