Լրատվական դաշտում արդիական է դարձել հարցը` ինչ է տեղի ունեցել իրականում. ՏԱՍՍ-ի տնօրեն

Տեղեկատվությունն աշխարհում դարձել է առաջնային կարևորության՝ մեծացնելով լրատվական գործակալությունների դերը: Գործակալությունն այսօր ոչ միայն պետք է տրամադրի տեղեկատվություն, այլև հետևողական լինի դրա որակին և հավաստիությանը: Այս մասին Մերձսևծովյան երկրների ազգային լրատվական գործակալությունների ասոցիացիայի գլխավոր ասամբլեայի 7-րդ նիստի ժամանակ «Արմենպրես»-ի հետ զրույցում ասաց Ռուսաստանի ՏԱՍՍ լրատվական գործակալության գլխավոր տնօրեն Սերգեյ Միխայլովը: «Լրատվական գործակալության համար դանդաղ առաջ շարժվելը նշանակում է հետ շարժվել, մենք պետք է վազենք, շատ արագ վազենք, որ հասցնենք աշխարհի զարգացումներին»,- ընդգծեց նա:

ՏԱՍՍ գործակալության տնօրենի խոսքով՝ աշխարհում ինֆորմացիայի 80 տոկոսը փոխանցվում է լրատվական գործակալությունների միջոցով: «Մենք կարծոմ ենք, որ դա ավելի քան 80 տոկոս է: Չնայած անընդհատ ասվում է, որ ինտերնետի և սոցցանցերի մատչելիությունը մարտահրավեր է լրատվական գործակալությունների համար, սակայն կարծում եմ, այդքան էլ այդպես չէ: Այսօր, երբ ինֆորմացիան ամենուր է, կարևոր է դառնում այն հարցը, թե ինչ է տեղի ուենցել իրականում և ինչպես է տեղի ունեցել»,- ասաց Միխայլովը:

Միխայլովի կարծիքով՝ աշխարհում տեղի ունեցող տեխնոլոգիական և քաղաքական զարգացումները նոր մարտահրավերներ են ստեղծում գործակալությունների համար: «Մեր խնդիրն է այնպես անել, որ մեր լրագրողները պատրաստ լինեն աշխատել ինչպես խաղաղ պայմաններում, այնպես էլ պատերազմական ժամանակներում և անպայման վերադառնալ ողջ: Այդ նպատակով մենք անցկացնում ենք ուսուցողական ծրագիր մեր լրագրողների համար՝ սովորեցնելով, թե ինչպես պետք է աշխատի լրագրողը պատերազմական և ճգնաժամային իրավիճակներում»,- հավելեց նա:

Երևանում նոյեմբերի 25-ին անցկացվում է Մերձսևծովյան երկրների ազգային լրատվական գործակալությունների ասոցիացիայի գլխավոր ասամբլեայի 7-րդ նիստը: Նիստին մասնակցելու նպատակով Հայաստան են ժամանել Ռուսաստանի, Վրաստանի, Ուկրաինայի, Ռումինիայի, Բուլղարիայի, Ալբանիայի ազգային լրատվական գործակալությունների գլխավոր տնօրենները, ինչպես նաև Թուրքիայի «Անադոլու» գործակալության միջազգային լրա տվության բաժնի խմբագիրը: Համաժողովին հրավիրված են նաև Կիպրոսի, Ղրղզստանի, Ղազախստանի, Բելառուսի լրատվական գործակալությունների տնօրենները: