«Անադոլու»-ի ներկայացուցիչը Երևանում կարևորեց համագործակցությունը հարևան երկրների գործակալությունների հետ

Փոփոխվող աշխարհում փոփոխվում են նաև լրագրության կանոնները, և լրագրության մեջ շատ կարևոր է լինել արագ, փոփոխվող ու վստահելի: Այս մասին նշեց «Անադոլու»-ի Միջազգային լրատվության բաժնի խմբագիր Օգյուն Դուրուն' Մերձսևծովյան երկիրների ազգային լրատվական գործակալությունների ասոցիացիայի գլխավոր ասամբլեայի 7-րդ նիստի ժամանակ: «Մենք ապրում ենք տեղեկատվական տեխնոլոգիաների դարաշրջանում և ազգային գործակալություներին նոր փորձություն է սպասվում: Շատանում են սոցիալական լրատվամիջոցներն ու պատերազմ է սկսվել ազգային գործակալությունների և սոցիալական մեդիայի միջև: Ազգային գործակալությունները պետք է տրամադրեն վստահելի և հավաստի տեղեկատվություն, պետք է աշխատեն արագ: Սա միակ եղանակն է դիրքերը չզիջելու սոցիալական մեդիային»,- «Արմենպրես»-ի փոխանցմամբ' ասաց Օգյուն Դուրոն' հավելելով, որ փոփոխվող աշխարհում ամենակարևորը մարդկային կապիտալն է, և գործակալությունն այդ առումով լուրջ ներդրումներ է կատարում:

«Նոր ծառայություններ, նոր գաղափարներ և ծրագրեր իրականացնելու, բաժանորդներին առավել լայն տեսակի ծառայություն մատուցելու համար հարկավոր է զարգացնել մարդկային կապիտալն ու խմբագրությունում ունենալ հասուն լրագրողներ, ովքեր կառանձնանան իրենց փորձագիտական մտքով և պրոֆեսիոնալիզմով: Ֆոտոլրագրություն, վիդեոլրագրություն, լրատվություն նաև անգլերեն: Այս ծառայությունների մատուցման ժամանակ մենք ցուցաբերում ենք մեծ պատասխանատվություն: 90-ականներին հակամարտությունների թիվը մեծացել է և ենթադրվում է, որ դրանք ոչ միայն կարճ ժամանակում չեն կարգավորվի, այլև նոր հակամարտությունների առիթ կդառնան: Հաշվի առնելով այս հանգամանքը՝ շատ կարևոր է, որ հակամարտության գոտիներում ունենանք թղթակիցներ: Ռազմական լրագրողների պատրաստումը մեր օրակարգում է, որպեսզի նրանք կարողանան աշխատել հակամարտության գոտիներում»,- ասաց Օգյուն Դուրոն:

Նոր տեխնոլոգիաների դարաշրջանում Դուրուն կարևորում է նաև համագործակցությունը հարևան գործակալությունների հետ:

«Օգնել միմյանց և տրամադրել հավաստի տեղեկատվություն: Սա շատ կարևոր է: Համագործակցությունը պետք է լինի երկկողմանի և փոխշահավետ»,- ասաց նա:

Մերձսևծովյան երկրների ազգային լրատվական գործակալությունների ասոցիացիան (ՄԱԼԳԱ) միջազգային ոչ առևտրային կազմակերպություն է, որը միավորում է մերձսևծովյան երկրների ազգային լրատվական գործակալությունների ջանքերը նրանց տեղեկատվական ռեսուրսներն արդյունավետորեն օգտագործելու, իրենց պետությունների քաղաքական, տնտեսական, գիտական ու մշակութային կյանքի կարևորագույն հարցերի շուրջ տեղեկատվության ազատ ու իրավահավասար փոխանակման, Սևծովյան տնտեսական համագործակցության կազմակերպության մասնակից երկրների տարածքում տեղեկատվության տարածման համար:

Միջազգային այս կազմակերպության անդամ են ATA-ն (Ալբանիա), «Արմենպրես»-ը (Հայաստան), «Ազերթաջ»-ը (Ադրբեջան), BTA-ն (Բուլղարիա), GHN-ը (Վրաստան), «Մոլդպրես»-ը (Մոլդովա), ՏԱՍՍ-ը (Ռուսաստան), «AGERPRES»-ը (Ռումինիա), ՏԱՆՅՈՒԳ-ը (Սերբիա), ANA-ն (Հունաստան), «Անադոլուն» (Թուրքիա), «Ուկրինֆորմ»-ը (Ուկրաինա), HINA-ն (Խորվաթիա), MIA-ն (Մակեդոնիա):