Գաբրիել Գարսիա Մարկեսի արխիվը գնել է Տեխասի համալսարանը

Հանրաճանաչ կոլումբիացի գրող Գաբրիել Գարսիա Մարկեսի արխիվը ձեռք է բերել Օսթինի Տեխասի համալսարանը, տեղեկացնում է «Արմենպրես»-ը՝ հղում անելով «Ասոշիեյթեդ պրես»-ին: Հավաքածուն վաճառքի է հանել գրականության Նոբելյան մրցանակի դափնեկրի ընտանիքը: Գործարքի գումարը չի հրապարակվում:

Հարրի Ռենսոնի Հումանիտար հետազոտությունների համալսարանական կենտրոնում հայտարարել են, որ արխիվը, որն ընդգրկում է գրողի ավելի քան կեսդարյա ստեղծագործական կյանքը, պարունակում է տասնյակ գրքերի ձեռագրեր, այդ թվում՝ նրա ամենահայտնի վեպերից մեկի՝ «Հարյուր տարվա մենության» ձեռագիրը:

Հավաքածուում կան նաև շուրջ երկու հազար նամակներ, ներառյալ մեքսիկացի գրող Կառլոս Ֆուենտեսի, ինչպես նաև բրիտանացի գրող և հետախույզ Գրեմ Գրինի հետ նամակագրությունը: Բացի այդ, Տեխասի համալսարանին կհանձնվեն այն գրամեքենաներն ու համակարգիչները, որոնց առջև աշխատել է գրողը:

Կոլումբիայի մշակույթի նախարար Մարիանա Գարսեսը Տեխասի համալսարանին գրողի արխիվի վաճառքը հսկայական կորուստ է համարել երկրի համար: Միևնույն ժամանակ գրողի ընտանիքում հայտարարել են, որ Կոլումբիայի իշխանություններն իրենց չեն դիմել Մարկեսի գրական ժառանգության խնդրով, հաղորդել է BBC News-ը:

Հիշեցնենք, որ Գաբրիել Գարսիա Մարկեսը 87 տարեկան հասակում ապրիլի 17-ին մահացել է Մեխիկոյում, որտեղ ապրել է ավելի քան 30 տարի: