«Հրապարակ». Նիկոլ Փաշինյանը մի քանի օր է՝ խաթարել է ոչ իշխանական եռյակի անդորրը

Սերժ Սարգսյանին իմպիչմենթ հայտնելու ՀԱԿ պատգամավոր Նիկոլ Փաշինյանի մտադրությունն արդեն մի քանի օր է՝ խաթարել է ոչ իշխանական եռյակի անդորրը: Գրում է «Հրապարակ»-ը:

Թեև հարցի վերաբերյալ կուսակցությունները դեռ չեն շտապում պաշտոնական դիրքորոշում հայտնել, բայց շարքերում տիրող անհանգստությունից ակնհայտ է, որ Փաշինյանը ոչ իշխանական դաշտի լյուստրացիա է նախաձեռնել' ցույց տալու համար, թե իրականում ով ով է: Փաշինյանը հիմա որոշման նախագիծն է պատրաստում, որից հետո այս ուրբաթ դիմելու է ոչ իշխանական ուժերին՝ անհրաժեշտ 44 ստորագրությունները հավաքելու և այս հարցն արտահերթ կարգով խորհրդարանի լիագումար նիստում քննարկելու համար:

Նա կարծում է, որ երկրում ստեղծված իրավիճակը պարտադրում է պատգամավորներին Սերժ Սարգսյանի իմպիչմենթի գործընթաց սկսել: Ասել է, որ միշտ էլ պատրաստ է եղել պաշտպանել այսպիսի նախաձեռնությունները, բայց քանի որ ոչ իշխանական ուժերն այդպիսի գործընթաց չեն սկսում, ինքն է նման նախաձեռնությամբ հանդես գալիս: Չնայած ՀՀ նախագահի իմպիչմենթը բազմափուլ գործընթաց է, և խորհրդարանի մեծամասնությունից է կախված՝ թույլ կտա՞ հարցը մտցնել նիստի օրակարգ, թե ոչ, այդուհանդերձ, ոչ իշխանականների և հատկապես ԲՀԿ-ի գործարար շարքերում խիստ լարված են և մտադիր չեն մասնակցել Փաշինյանի նախաձեռնությանը: Հարցից խուսափում է անգամ պատգամավոր Արմեն Ավետիսյանը, ով ԲՀԿ-ի գործարար և քաղաքական շերտերի ճամփաբաժանում է:

Զրույցի սկզբում ԲՀԿ-ական պատգամավորը փորձեց գլուխը պրծացնել՝ հայտարարելով, թե մարզում է եղել, որտեղ ինտերնետ չկա, և ծանոթ չէ Փաշինյանի նախաձեռնությանը: Նրանից հետաքրքրվեցինք ԲՀԿ-ի պլանների և իշխանափոխության խոստումների մասին: «Մենք արդեն ասել ենք, բերեք չշարունակենք»,- սաստեց պատգամավորը: «ԲՀԿ-ի առաջնորդը հստակ ասել է, թե ինչ ենք ուզում, իշխանափոխության երկու ճանապարհ կա, կամ դա հեղաշրջումն է, որին մենք կողմնակից չենք, և կա սահմանադրական նորմերի մեջ իշխանափոխություն, որի մեջ մտնում են նաև արտահերթ և հերթական ընտրությունները, իսկ դրա համար գործընթացը ցույց կտա»:

Սերժ Սարգսյանին իմպիչմենթ հայտնելու գործընթացը հեղափոխակա՞ն քայլ է: «Ես էդ հարցն էս պահին չեմ քննարկում»: ԲՀԿ-ական Միքայել Մելքումյանն էլ է ասում, որ իրենք ունեն քաղաքական օրակարգ, որի մեջ է մտնում արտահերթ ընտրությունների հարցը, առանց նախագահի հրաժարականի շեշտադրության: «Մենք ասում ենք՝ արտահերթ ընտրություններ, այս պահին չենք բացում, բայց հասկանալի է, պետք է տրամաբանորեն հասկանալ»,- իր հերթին խույս է տալիս Մելքումյանը:

Շարունակությունը՝ թերթի այսօրվա համարում