Սամվել Ալեքսանյանի «թեթև ձեռքով» բարձրացել է ալյուրի գինը

Այս տարվա մարտի 25-ից մինչև մայիսի 26-ն ընկած ժամանակահատվածում բարձր տեսակի ալյուրի գինը բարձրացել է: Նախկին 207.9 դրամի փոխարեն դարձել է 219 դրամ: Այս մասին ԼՈւՐԵՐ.com-ի թղթակցի հետ զրույցում ասաց Տնտեսական մրցակցության պաշտպանության պետական հանձնաժողովի մրցակցության գնահատման բաժնի պետ Մանուկ Միքայելյանը:

Նշենք, որ շուկայում կան գերիշխող դիրք ունեցող տնտեսվարող սուբյեկտներ: Մասնավորապես՝ երկու տնտեսվարող սուբյեկտ կա, որ գերիշխող դիրք ունի, դրանք են «Մանանա գրեյը» և Ազգային ժողովի պատգամավոր Սամվել Ալեքսանյանին պատկանող «Ալեքս Գրիգ» ընկերությունը:

«Մենք ամեն օրվա կտրվածքով գների դիտանցում իրականացնում ենք: Իմ ձեռքի տակ եղած տվյալներով՝ 2015 թվականի մարտի 29-ի դրությամբ բարձր տեսակի ալյուրի մեկ կիլոգրամի գինը եղել է 207.9 դրամ, որը մայիսի 26-ի դրությամբ դարձել է 219 դրամ: Բայց մինչև այդ՝ տարեսկզբին,  ալյուրի գինը եղել է 265 դրամ: Այսինքն՝ ճիշտ է մարտի 29-ից մինչև մայիսի 26-ը որոշակի բարձրացում ունեցել ենք, բայց մինչ դա գները նվազել էին՝ 265 դրամից դարձել է 207 դրամ: »,- ասաց մեր զրուցակիցը:

Ըստ ՏՄՊՊՀ տվյալների՝ շուկայում այս պահի դրությամբ որևէ խնդիր չկա, մուտքի խոչընդոտներ ևս չկան, գնային փոփոխություններ միշտ էլ կլինեն, որովհետև գների վրա տարբեր բնույթի գործոններ են ազդում՝ առաջարկ-պահանջարկ, փոխարժեք, տարբեր ընթացակարգային խնդիրներ:

Մեր այն հարցին, թե Հայաստանի ԵՏՄ-ին անդամակցելուց հետո ռուսական ալյուրի ներկրման արդյունքում էականորեն նվազեց Հայաստանում վաճառվող ալյուրի գինը, սակայն նորից բարձրացում է գրանցվում, ինչի՞ հետևանք է դա, Միքայելյանը մեկնաբանեց. 

«ԵՏՄ անդամակցությամբ չի բացառվում մաքսատուրքեր չվճարելու, մի շարք այլ ընթացակարգերի հեշտացման արդյունքում որոշ տնտեսավարող սուբյեկտներ հնարավորություն են ունեցել ներկրել ալյուր՝ էժան գներով: Սա վկայում է այն մասին, որ շուկայում խնդիրներ չկան: Եթե ինչ-որ տնտեսվարող սուբյեկտներ ներկրել են այդ ալյուրը՝ դա խոսում է այն մասին, որ մուտքի խոչընդոտ չկա»:

Նկատենք, որ «Ժամանակ» օրաթերթն այսօրվա իր համարում գրել է, որ Սամվել Ալեքսանյանը գտել է Ռուսաստանից Հայաստան ալյուրի ներկրումներն արգելելու և իր ապրանքը մենաշնորհային գնով վաճառելու հնարավորությունը: Այն անհատները կամ ընկերությունները, որոնք մի քանի անգամ Ռուսաստանից ալյուր են ներմուծել Հայաստան, հայտնվել են ստուգող կազմակերպությունների տեսադաշտում: Երբ ալյուր ներկրողները կանգնել են անհաղթահարելի խնդիրների առջև, Ալեքսանյանը սկսել է կրկին բարձրացնել ալյուրի գինը: