Կառավարությունը հաստատեց ՀՀ ՔՕ նոր հայեցակարգը

Հայաստանի կառավարությունը հավանություն տվեց ՀՀ քրեական նոր օրենսգրքի հայեցակարգին:

«Արմենպրես»-ի հաղորդմամբ՝ ՀՀ արդարադատության նախարար Հովհաննես Մանուկյանը նշեց, որ օրենսգրքում մինչ այժմ առկա են եղել բազմաթիվ թերություններ, և պատահական չէ, որ մինչ այժմ կատարվել է մոտ 100 փոփոխություն և լրացում։ Միաժամանակ, նախարարը նկատեց, որ շատ հաճախ արված փոփոխությունները ոչ թե շտկել են վիճակը, այլ ընդհակառակը՝ ավելացրել օրենսգրքում առկա հակասություններն ու թերությունները։ «Փոփոխությունների մի մասը կատարվել է պահի ազդեցության տակ, կոնկրետ դեպքի կապակցությամբ, առանց հաշվի առնելու օրենսգրքի ընդհանուր տրամաբանությունը։ Մյուսները զուրկ են կրիմինոլոգիական հիմնավորվածությունից կամ հակասում են քրեական իրավունքի տեսության ժամանակակից միտումներին»,- ասաց նախարարը։

Հովհաննես Մանուկյանն ակնկալում է, որ նոր հայեցակարգով կբարձրանա մարդու իրավունքների քրեաիրավական պաշտպանվածության մակարդակը, կբացառվեն հանցագործությունների որակման կանոնների սահմանման և հանցակազմերի հստակ ձևակերպման միջոցով քրեաիրավական նորմերի սխալ կիրառումը, դատական սխալները, կբարձրանա պատժի նշանակման կանոնների սահմանմամբ' պատժի արդյունավետության մակարդակը: «Միաժամանակ, այլընտրանքային պատժատեսակների ցանկի ընդլայնմամբ' ազատությունից զրկելու հետ կապված պատժատեսակների նշանակման ծավալներն էականորեն կնվազեն, կկատարելագործվեն քրեական պատասխանատվությունից ու պատժից ազատելու ինստիտուտները, կստեղծվեն հանցանք կատարած անձի ուղղման և վերասոցիալականացման նպատակի իրագործման արդյունավետության նախադրյալներ»,- ասաց Մանուկյանը՝ ավելացնելով, որ հայեցակարգը կնպաստի նաև քրեական օրենսդրության ոլորտում ՀՀ ստանձնած միջազգային պարտավորությունների կատարման ապահովմանը: