«Տանգո» ընկերությունը կգնի ԱԳՆ-ի շենքում գտնվող «Արարատ» ռեստորանը

ՀՀ կառավարությունը փոփոխություն կատարեց «Տանգո» ՓԲԸ-ի կողմից ՀՀ-ի սեփականություն հանդիսացող ՀՀ արտաքին գործերի նախարարության՝ Կառավարական թիվ 2 մասնաշենքի, ինչպես նաև «Արարատ» ռեստորանի ՍՊԸ-ինսեփականության իրավունքով պատկանող շենքի հատվածի գնման նպատակով սահմանված վճարումների կատարման ժամանակացույցում:Ռեստորանը պետք է գնի «Տանգո» ընկերությունը, որն էլ ԱԳՆ շենքի սեփականատերն է:

ՀՀ պետական գույքի կառավարման վարչության պետ Արման Սահակյանը նշեց, որ գնորդը, որպես գույքի գնման կանխավճար, պայմանագրի օրվա կնքումից հետո 3 բանկային օրվա ընթացքում «Արարատ» ռեստորանի սեփականատիրոջը պետք է վճարի 140 հազար դոլարին համարժեք դրամ: Բանակցությունների արդյունքում կողմերի միջև պայմանավորվածություն է ձեռք բերվել նշված կանխավճարը վճարել 10 բանկային օրվա ընթացքում' 1 միլիոն դոլարի չափով: Սահակյանը հիշեցրեց՝ կառավարության նախորդ որոշմամբ սահմանվել էր, որ «Տանգո» ՍՊԸ-ն 7 միլիոն դոլարի համարժեք դրամ պետք է վճարի գույքի առուվաճառքի պայմանագիրը ստորագրելու օրվանից 2 տարի հետո: «7 միլիոնից 4 միլիոնն արդեն վճարվել է, իսկ 3-ը պետք է վճարվեր այս տարվա մարտին: Սակայն որոշման նախագծով այդ ժամկետը երկարաձգվում է մինչև հուլիսի 1-ը»,- ասաց Սահակյանը:

ՀՀ վարչապետ Հովիկ Աբրահամյանն իր հերթին նշեց, որ արգենտինահայ գործարար Էդուարդո Էռնեկյանի հետ պայմանավորվել էին, որ 3 մլն-ը պետք է վճարվեր այս շաբաթ: Ի պատասխան՝ Արման Սահակյանն ասաց, որ մի մասը՝ հարկային պարտավորությունների մասով արդեն վճարված է, մյուս մասն էլ մոտակա օրերին կվճարվի, պարզապես տեխնիկական հարցերով պայմանավորված է նախագծում նման ժամկետ սահմանվել:

ՀՀ արտաքին գործերի նախարարության շենքը գնել է Էռնեկյանին պատանող «Տանգո» ընկերությունը: