Եկեղեցու հիմնարկեքի արարողություն Նշավան համայնքում

Հունիսի 4-ին Արարատյան Հայրապետական թեմի Նշավան համայնքում ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոսի ձեռամբ կատարվեց եկեղեցու հիմնարկեքի արարողություն: Նախօրոք ջրով և գինով լվացված՝ հիմքերի 16 քարերը Սրբազան հոր ձեռամբ օծվեցին սրբալույս մյուռոնով: Ապա 16 անձիք՝ պաշտոնյաներ և համայնքի անդամներ, քարերը տեղադրեցին Քրիստոսի 12 առաքյալներին, ավետարանիչներին, ս. Գրիգոր Լուսավորչին և ս. Պողոս առաքյալին խորհրդանշող սյուների հիմքում:

Արարողությանը ներկա էին Արարատի մարզպետ Ռուբեն Աբրահամյանը, Արարատի մարզի հարկայինի պետ Վարդան Մամիկոնյանը, Նշավանի գյուղապետ Պապ Հակոբյանը, դպրոցի տնօրեն Մարինե Բագրատյանը, համայնքի անդամներ, հավատացյալներ:

Նշավանը երբեք եկեղեցի չի ունեցել: Այդ պատճառով գյուղի բնակիչների համար այս իրադարձությունը բացառիկ էր. նրանք հույս ունեն, որ շուտով իրենց եկեղեցում կկատարվեն բոլոր արարողությունները՝ մկրտություններ, պսակներ և այլն: Համայնքը թեև չունի գործող եկեղեցի, բայց Բյուրավանի Ս. Գրիգոր Լուսավորիչ եկեղեցու հոգևոր հովիվ Տ. Ղազար քահանա Պետրոսյանը այստեղ այցելու հովիվ է. նրա հովվությունում յոթ գյուղեր են ներառված:

Գյուղն ունի բավական լավ համայնք: Դպրոցի տնօրեն Մարինե Բագրատյանն իր աջակցությունն է բերում քահանային, որպեսզի իր համագյուղացիները զերծ ու պաշտպանված լինեն օտարամուտ, այլադավան ազդեցություններից:

Եկեղեցին կառուցվում է համայնքի ջանքերով: Տարածքը նվիրաբերել է համայնքի բնակիչ Վարդան Մամիկոնյանը:

-Ուրախ ենք, որ այս համայնքը իր սեփական ջանքերով որոշել է եկեղեցի ունենալ: Հուսով ենք, որ շուտով այստեղ վեր կխոյանա ջերմեռանդորեն և բարեխղճորեն կառուցված Աստծո տաճարը: Թող արդարների բնակարան, և մեղավորների քավարան լինի այս եկեղեցին: Աստծո ներգործությամբ ձեր հոգիներում թող ծաղկեն սերը, եղբայրասիրությունը, հայրենասիրությունը,- շնորհավորելով նշավանցիներին՝ ասաց Տ.Նավասարդ Սրբազանը:

Արարողության ավարտին համայնքի կողմից մատաղ մատուցվեց և բաժանվեց հյուրերին:

Արարատյան Հայրապետական թեմի տեղեկատվական բաժին