Մաշկաբանը խորհուրդ է տալիս արտերկրում միջատներից պաշտպանվելու համար պատվաստվել

Մաշկաբան-վեներոլոգ Հովհաննես Հովհաննիսյանն օգտակար խորհուրդներ է տալիս, թե ինչպես ամառային հանգստի ընթացքում խուսափել մաշկային հիվանդություններից: Հունիսի 6-ին լրագրողների հետ հանդիպմանը մաշկաբանը նկատեց, որ ամառը տարվա այն ժամանակահատվածն է, երբ ջերմաստիճանի տատանումները և արևի ճառագայթումը նախ անդրադառնում են մարդու մաշկի վրա: «Պետք չէ մոռանալ նաև, որ որոշ վարակային հիվանդությո ւններ կան, որոնք կարող են փոխանցվել միջատների միջոցով: Բարեբախտաբար, վնասակար միջատներով «հարուստ» երկրներ մեկնելուց առաջ խորհուրդ է տրվում տարբեր տեսակի պատվաստումներ անցնել, սակայն, ցավոք, շատերը չեն հետևում այդ խորհուրդներին և հետո խնդիրներ են ունենում. Վերադառնում են ոչ միայն լավ հիշողություններով, այլ նաև «հետաքրքիր հիվանդություններով»: Նաև կարևոր է, որպեսզի ամառային հանգստի ընթացքում մարդիկ զգուշանան սեռավարակներով հիվանդանալուց: Բարեբախտաբար, Հայաստանում սեռավարակներն այդքան տարածված չեն: Սակայն դրանք տարածված են մեր հարևան երկրներում, ուստի, այդ երկրներում հանգստացող մեր քաղաքացիներին խորհուրդ է տրվում զգոն լինել՝ տարբեր տեսակի սեռավարակներից խուսափելու համար»,- «Արմենպրես»-ի հաղորդմամբ՝ ասաց մաշկաբանը:

Ճառագայթումից խուսափելու համար նա խորհուրդ է տալիս նախօրոք ճշտել, թե հանգստի վայրում, ուր մեկնում է մարդը, ինչ աստիճանի ուլտրամանուշակագույն ճառագայթում կա, և դրան համապատասխան արևային քսուքներ վերցնել: «Սա շատ կարևոր է, որովհետև կան ստանդարտ արևապաշտպան քսուքներ, որոնք, միգուցե, Երևանի պայմաններում օգնեն, սակայն Սև ծովի ափին չեն կարող օգնել: Դրա համար, մեկնալուց առաջ, եթե ունեք խնդիրներ մաշկի հետ, ալերգիկ ռեակցիաներ, լավ կլինի խորհրդակցել բժշկի հետ և նրա օգնությամբ որոշել, թե ինչ արևապաշտպան քսուքներ է պետք օգտագործել՝ խնդիրներից խուսափելու համար»,- նշեց նա:

Դիտարկմանը, թե շատերը քսուքներ են տանում հատուկ արևայրուք ստանալու համար, մաշկաբանը նշեց, որ եթե նախկինում մարդը չի ունեցել արևի բացասական ազդեցություն մաշկի վրա, ապա արևայրուք ստանալուց վախենալ պետք չէ: «Արևայրուքը, միանշանակ, դրական ազդեցություն ունի մեր մաշկի վրա: Ուղղակի, հարկավոր է ճիշտ «օգտվել արևից», առողջ և գեղեցիկ արևայրուք ստանալու համար: Այս դեպքում արևայրուքի համար նախատեսված քսուքներն այդքան կարևոր չեն: Ուղղակի հարկավոր է ժամը 12:00-ից մինչև 16:00-ն խուսափել արևից, իսկ դրանից հետո լինել արևի տակ: Այդ դեպքում հնարավոր կլինի ունենալ առողջ և գեղեցիկ արևայրուք և շատ հաճախ քսուքների կարիք անգամ կարող է չլինել»,- ասաց մաշկաբանը: