Աշխարհի եկեղեցիները Ծիծեռնակաբերդում միասնական աղոթքով դատապարտեցին ցեղասպանությունները

Եկեղեցիների համաշխարհային խորհրդի գործադիր կոմիտեի անդամները Ծիծեռնակաբերդի հուշահամալիրում ընդհանրական աղոթք հղեցին առ Աստված: Նրանք իրենց աղոթքում հիշատակեցին Հայոց ցեղասպանության սուրբ նահատակներին, դատապարտեցին ցեղասպանություններն ու մերժողականությունը, աղոթեցին Իրաքի քրիստոնյաների, առևանգված հոգևորականների, ինչպես նաև աշխարհում խաղաղության հաստատման համար: «Արմենպրես»-ի փոխանցմամբ` աղոթքը մատուցվեց Մայր Աթոռ Սուրբ Էջմիածնի Միջեկեղեցական Հարաբերությունների բաժնի տնօրեն Տ. Հովակիմ եպիսկոպոս Մանուկյանի գլխավորությամբ, եկեղեցիների մոտ 40 ներկայացուցիչների, հայ սարկավագների մասնակցությամբ: Հուշահամալիրում հրապարակվեց նաև ԵՀԽ Կենտրոնական կոմիտեի հայտարարությունը Հայոց Ցեղասպանության 100-րդ տարելիցի առիթով: Մասնավորապես, ընդունված հայտարարությամբ կոչ է արվում միջազգային հանրությանը, ԵՀԽ անդամ երկրներին և բարի կամքի տեր մարդկանց հիշատ ակել Հայոց ցեղասպանությունը` այդպիսով կանխելով ցեղասպանությունները և մարդկության հանդեպ մյուս հանցագործությունները:

«Այսպիսի իրադարձությունների մերժումը, անպատիժ մնալը և հիշելու ձախողումը առաջ է բերում այդ հանցագործության կրկնությունը: Հայոց ցեղասպանության 100-րդ տարելիցի ոգեկոչումը պետք է նշանավորվի այն ժամանակների ավարտով, երբ կառավարությունները ժխտում են տեղի ունեցածը` չանվանելով այն ցեղասպանություն: Մենք պահանջում ենք բոլոր կառավարություններից հրաժարվել այդ դիմադրությունից»,-ասված է հայտարարության մեջ:

Եկեղեցիների համաշխարհային խորհրդի գլխավոր քարտուղար Օլաֆ Թվեյթը լրագրողների հետ զրույցում նշեց, որ Եկեղեցիների համաշխարհային խորհուրդը պաշտոնապես ճանաչել է Հայոց ցեղասպանությունն ու քայլեր է ձեռնարկում միջազգային ընդունման համար: «Անդամ եկեղեցիները 110-ից ավելի երկրներում տեղեկացած են այս մասին: Այս տարի 100-րդ տարելիցը ոգևոկոչվեց տարբեր ձևերով, դրանից մեկն էլ մեր խորհրդի կողմից հայտարարության ընդունումն էր: Ես վստահ եմ, որ եկեղեցիների ներկայացուցիչները կբարձրացնեն իրենց ձայնը բոլոր կառավարությունների առաջ՝ ճանաչելու այդ դաժան երևույթը՝ Հայոց ցեղասպանությունը: Այս տարին պետք է օգտագործել բոլոր տեսակի հանցագործությունների, մարդու իրավունքների ոտնձգության դեմ պայքարի նպատակով, որտեղ էլ դրանք տեղի ունեցած լինեն»,-ասաց Օլաֆ Թվեյթը: Նրա խոսքով՝ աղոթում են, որպեսզի հայ ժողովրդի ու ողջ մարդկության համար պատմական արդարություն հաստատվի:

Հովակիմ Սրբազանը հայտնեց, որ Եկեղեցիների համաշխարհային խորհրդը 1979 թվականից մինչ օրս իր նպաստն է բերում Հայոց ցեղասպանության միջազգային ճանաչման հարցում, որի արտացոլում էլ Ցեղասպանության 100-րդ տարելիցի առիթիվ ընդունված հայտարարությունն է, որով կոչ է արվում անդամ եկեղեցիներին միանալ այդ գործին:

Հունիսի 8-13-ին Մայր Աթոռ Ս.Էջմիածնում ընթանում է Եկեղեցիների Համաշխարհային Խորհրդի Գործադիր կոմիտեի հնգօրյա նիստը: