Հայաստանում այս տարի նվազել է ամուսնացողների ու ամուսնալուծվողների թիվը

Ընթացիկ տարվա առաջին եռամսյակում հանրապետությունում նվազել են մի կողմից` ամուսնության, մյուս կողմից` ամուսնալուծության դեպքերը: 2015 թվականի առաջին եռամյսակում գրանցվել է ամուսնության 4 հազար 346 դեպք, որը, նախորդ տարվա նույն ժամանակահատվածի համեմատ, նվազել են 9 տոկոսով: Յուրաքանչյուր 1000 բնակչի հաշվով գործակիցը կազմել է 5.9 պրոմիլ, այլ կերպ ասած` 1000 բնակչին բաժին է ընկել ամուսնության 6 դեպք: Նշյալ տվյալները հունիսի 10-ին լրագրողներին ներկայացրեց ՀՀ Ազգային վիճակագրական ծառայության մարդահամարի և ժողովրդագրության բաժնի պետ Կարինե Կույումջյանը: Ինչ վերաբերում է ամուսնալուծություններին, ապա 2015 թվականի առաջին եռամսյակում գրանցվել է ամուսնալուծության 938 դեպք: «Արձանագրվել է ամուսնալուծությունների նվազում 22.5 տոկոսով: 2014 թվականի առաջին եռամսյակում գրանցվել է ամուսնալուծության 1210 դեպք»,-«Արմենպրես»- ի փոխանցմամբ` տեղեկացրեց Կարինե Կույումջյանը:

Վիճակագրագետի դիտարկմամբ` ամուսնության և ամուսնալուծության ամենաբարձր ցուցանիշները բնորոշ են Լոռու մարզին: «Ամուսնությունների դեպքերով բարձր ցուցանիշները գրանցվել են Արագածոտնում, Արմավիրում, Գեղարքունիքում, ամենաբարձր ցուցանիշն արձանագրվել է Լոռու մարզում, իսկ ամենացածրը` Երևանում և Սյունիքում»,-նշեց Կարինե Կույումջյանը:

Ամուսնալուծությունների թվով Լոռու մարզին հաջորդում է Արագածոտնը: «Լոռիում 1000 բնակչի հաշվով ամուսնալուծությունների գործակիցը 2.5 պրոմիլ է, այսինքն` այդքան ամուսնությունների մեջ արձանագրվել է 2-3 ամուսնալուծություն, Արագածոտնի գործակիցը 1.7 պրոմիլ է»,-ասաց բանախոսը:

Ամուսնալուծությունների համեմատաբար ցածր ցուցանիշներ գրանցվել են Տավուշում, Գեղարքունիքում, Արմավիրում: «Տավուշում 0.5 պրոմիլ է, այլ կերպ ասած` 2 հազար ամուսնությունների հաշվով 1 ամուսնալուծության դեպք է բաժին ընկնում»,-ավելացրեց Կարինե Կույումջյանը:

Նրա տեղեկացմամբ` աղջիկների 70 տոկոսից ավելին ամուսնության քայլը կատարում է 20-29 տարեկանում, իսկ տղամարդկանց դեպքում` 25-34 տարեկանում:

Պաշտոնյան ներկայացրեց նաև վերջին վեց տարիներին ամուսնությունների-ամուսանալուծությունների համեմատական պատկերը, ըստ որի, վերջին երեք տարիներին ամուսնալուծության աճ է նկատվում: Նրա խոսքով` 2009-2011 թվականներին, եթե 1000 ամուսնությունների հաշվով արձանագրվել է 160 ամուսնալուծություն, ապա 2012-2014-ին` 204 նմանատիպ դեպք: Կրկին ամենաշատը տեսանելի է Լոռու մարզում: