Ուորլիքը հանդիպել է Բաքու մեկնող հայ մարզիկներին

Լեռնային Ղարաբաղի հակամարտության կարգավորման խնդրով զբաղվող ԵԱՀԿ Մինսկի խմբի ԱՄՆ համանախագահ Ջեյմս Ուորլիքը Երևանում հանդիպել է Բաքվում կայանալիք առաջին Եվրոպական խաղերին մասնակցող հայ մարզիկների հետ: Այս մասին «Թվիթեր»-ի միկրոբլոգում գրառում է արել Հայաստանում ԱՄՆ դեսպանատունը:

Հայ մարզիկների հետ հանդիպմանը ներկա են եղել Հայաստանի օլիմպիական կոմիտեի նախագահ Գագիկ Ծառուկյանը, ՀՀ սպորտի և երիտասարդության հարցերի նախարար Գաբրիել Ղազարյանը, հայ հայտնի մարմնամարզիկ Ալբերտ Ազարյանը և այլք: Հանդիպմանը ներկա է եղել նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը:

Ուորլիքը ղարաբաղյան հիմնախնդիրների շուրջ բանակցություններ իրականացնելու նպատակով Հայաստան է ժամանել հունիսի 9-ին: Նա արդեն հանդիպում է ունեցել ՀՀ արտաքին գործերի նախարար Էդվարդ Նալբանդյանի հետ: Ավելի վաղ հաղորդվել էր, որ հունիսի 12-ին Ուորլիքը կմասնակցի Բաքվի Եվրոպական խաղերի բացման արարողությանը:

Առաջին Եվրոպական խաղերը կանցկացվեն Բաքվում 2015 թվականի հունիսի 12-28-ը։ Հայաստանն այդ խաղերում ներկայացված կլինի 6 մարզաձևով՝ բռնցքամարտ, ըմբշամարտ, սամբո, ձյուդո, թաեքվոնդո, հրաձգություն, և կունենա 25 մարզիկ: Բռնցքամարտում Հայաստանը կներկայացնեն 6 մարզիկներ՝ Արտյոմ Ալեքսանյան (49 կգ), Նարեկ Աբգարյան (52 կգ), Արամ Ավագյանը (56 կգ), Սամվել Բարսեղյան (60 կգ), Հովհաննես Բաչկով (64 կգ), Նիկոլ Հարությունով (81 կգ): Ձյուդոյում՝ 3 մարզիկներ՝ 60 կգ քաշային Հովհաննես Դավթյան, 73 կգ քաշային Դավիթ Նիկոսղոսյան և 52 կգ քաշային Ժաննա Ստանկևիչ: Հրաձգությունում՝ 2 մարզիկ՝ Հրաչիկ Բաբայան, Նորայր Առաքելյան: Հունահռոմեական ոճի ըմբշամարտտում 4 մարզիկ՝ Ռոման Ամոյան (55 կգ), Միհրան Հարությունյան (66 կգ), Կարապետ Չալյան (75 կգ) և Մաքսիմ Մանուկյան (85 կգ): Ազատ ոճայիններ՝ 6 մարզիկ՝ Գարիկ Բարսեղյան (57 կգ), Վոլոդյա Ֆրանգուլյան (61 կգ), Դավիթ Սաֆարյան (65 կգ), Գրիգոր Գրիգորյան (74 կգ), Մուրսա Մուրթազալիև (86 կգ), Լևան Բերյանիձեն (125կգ): Սամբո՝ 3 մարզիկ՝ Տիգրան Կիրակոսյան, Աշոտ Դանիելյան, Սոսե Բալասանյան: Թաեքվոնդո՝ Արման Երեմյան: Բաքվի խաղերում Հայաստանը կներկայացնող մարզիներից նրանք, ովքեր կնվաճեն առաջին հորիզոնականը ստանան 50 հազար ԱՄՆ դոլար, երկրորդ տեղը՝ 30 հազար, իսկ երրորդ տեղը՝ 20 հազար դոլար: Իսկ մարզիչներին կհատկացվի այդ ամենի 50 տոկոսը: Առաջին խումբը կմեկնի հունիսի 10-ին: Իսկ պատվիրակության կազմում, ընդհանուր առմամբ, կլինի 53 անդամ: