ԼՂՀ խորհրդարանը քննարկել է պետական գերատեսչությունների աշխատանքի կատարողականները

ԼՂՀ Ազգային ժողովում կայացել է պետական-իրավական ու ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստ, որը վարել են նշված հանձնաժողովների նախագահներ Հովիկ Ջիվանյանն ու Ռուսլան Իսրայելյանը: Նիստին ներկա են եղել ԼՂՀ ԱԺ նախագահ Աշոտ Ղուլյանը և ԱԺ նախագահի տեղակալ Վահրամ Բալայանը:

Նիստի ընթացքում ներկայացվել են Լեռնային Ղարաբաղի Հանրապետության նախագահի, կառավարության, Ազգային ժողովի աշխատակազմերի, արդարադատության նախարարության, Գերագույն դատարանի, դատախազության, վերահսկիչ պալատի, մարդու իրավունքների պաշտպանի գրասենյակի, քաղծառայության խորհրդի և կենտրոնական ընտրական հանձնաժողովի 2014թ. պետական բյուջեի կատարման տարեկան հաշվետվությունները:

ԼՂՀ նախագահի աշխատակազմի ղեկավար Մարատ Մուսայելյանի հաղորդմամբ՝ աշխատակազմի աշխատանքները կազմակերպելու համար 2014թ. պետական բյուջեով նախատեսվել է 407 մլն 342 հազար դրամ, փաստացի ծախսերը՝ 280 մլն 526 հազար դրամ կամ նախահաշվի 69 տոկոսը:

Կառավարության աշխատակազմի ղեկավար Լևոն Գրգորյանը, ներկայացնելով 2014թ. պետական բյուջեի կատարման հաշվետվությունը, նշեց , որ կառավարության բյուջեի տարեկան նախահաշիվը կազմել է 540 մլն 370 հազ. 900 դրամ, կատարողականը՝ 506 մլն 397 հազ. 600 դրամ կամ 93,7 տոկոսը:

Ազգային ժողովի 2014թ. պետական բյուջեի տարեկան հաշվետվությունը ներկայացրել է աշխատակազմի ղեկավար Գարիկ ժամհարյանը: Հաշվետվության համաձայն՝ ԱԺ աշխատակազմի տարեկան նախահաշիվը կազմել է 341մլն 504 հազար դրամ, կատարողականը՝ 319 հազար 901,4 դրամ կամ 94 տոկոս:

Նիստի ընթացքում ԼՂՀ Ազգային ժողովի պատգամավորները հնարավորություն են ունեցել նաև հարցերի միջոցով պարզաբանումներ ստանալ այս կամ այն ոլորտի հաշվետվությունների կատարողականի վերաբերյալ:

Պետական-իրավական մշտական հանձնաժողովի նախագահ Հովիկ Ջիվանյանն առաջարկել է առաջիկայում կիրառման մեջ դնել բյուջեի կատարողականների ներկայացման բացված տարբերակը: