Պորտուգալիայի հավաքականը մեզ Հայաստանում չի հաղթել և չի էլ հաղթելու. Շարմազանով

Ազգային ժողովի փոխնախագահ Էդուարդ Շարմազանովը վստահ է, որ ֆուտբոլի Հայաստանի հավաքականը չի պարտվի Պորտուգալիայի հետ առաջիկա խաղում։ ՀՀԿ գործադիր մարմնի նիստից հետո լրագրողների հետ զրույցում Շարմազանովը նկատեց, որ Պորտուգալիայի հավաքականը միշտ էլ դժվար է խաղացել Հայաստանի հետ: «Միշտ էլ պորտուգալացիները մեզ հետ դժվար են խաղացել: Հայաստանում մեզ երբեք չեն հաղթել ու չեն էլ հաղթելու, խնդիրն այն է՝ մենք իրենց կհաղթե՞նք, թե՝ չէ»,- «Արմենպրես»-ի հաղորդմամբ՝ նշեց Շարմազանովը:

Նա հիշեցրեց, որ Երևանում կայացած խաղերից մեկն ավարտվել է 0-0 հաշվով, մի դեպքում էլ Հայաստանի հավաքականը սկզբում բացել է հաշիվը, հետո գնդակ բաց թողել, ու խաղը կրկին ավարտվել է ոչ-ոքիով:

Հարցին, թե նվազագույնը ոչ-ոքի է կանխատեսում այդ խաղում, Շարմազանովն ընդգծեց․ «Քանի որ ես ֆուտբոլում մաքսիմալիստ եմ, ես ցանկանում եմ, որ այդ օրը ողջ Երևանը եռագույնով պատված լինի, այսինքն՝ մենք բոլորս տոնենք հայոց հավաքականի հաղթանակը և շնորհավորենք Սարգիս Հովսեփյանին՝ իր փայլուն նորամուտի առթիվ»։

Շարմազանովը պատրաստվում է հավաքականին աջակցել հենց մարզադաշտում, սակայն տոմս ձեռք բերել դեռ չի հասցրել: Ամեն դեպքում, ԱԺ փոխնախագահն ասաց, որ լավ ընկերներ ունի, ովքեր իրեն տոմս կնվիրեն:

Հունիսի 13-ին. Ժամը 20:00-ին «Վազգեն Սարգսյանի անվան Հանրապետական մարզադաշտում» Հայաստանի ազգային հավաքականը Եվրո-2016-ի ընտրական փուլի շրջանակներում կընդունի Պորտուգալիայի ընտրանուն: Պորտուգալիայի հավաքականն արդեն ժամանել է Երևան: