«Ես ոգևորված եմ. մեր թատրոնը վերելք է ապրում». Լալա Մնացականյան

Այսօր տեղի ունեցավ «ԱՐՏ ՖԵՍՏ» 2015 երիտասարդական հանրապետական երրորդ բաց փառատոնի մրցանակաբաշխության հանդիսավոր արարողությունը:

Փառատոնի շրջանակում ներկայացրեցին արվեստի հետևյալ տեսակները՝ թատերական արվեստ՝ կինոարվեստ, երգարվեստ, դիզայն և դեկորատիվ-կիրառական արվեստ, կերպարվեստ՝ գեղանկարչություն, լուսանկարչություն, գրաֆիկա, քանդակագործություն։

ԼՈՒՐԵՐ.com-ի թղթակցի հետ զրույցում ժյուրիի անդամ դերասանուհի Լալա Մնացականյանը կարևորեց նման փառատոնների առկայությունը: Ըստ դերասանուհու՝ այս կերպ ակտիվանում է մշակութային կյանքը:

Խոսելով մեր երիտասարդության մասին՝ դերասանուհին նկատում է՝ այսօր մեկը մյուսից ուժեղ երիտասարդներ են մտնում թատերական աշխարհ: Եղել են հետաքրքիր ներկայացումներ, դերակատարումներ, մեկնաբանություններ:

«Ես ոգևորված եմ: Մեր թատրոնը վերելք է ապրում, ոնց որ սկսում է ծնվել: Զարգացումը կա. ուրույն մտածողությամբ երիտասարդություն է գալիս: Թերևս, բացահայտվելը քիչ է, նրանց բնավորությունն է կարևոր` չընճվելը, չհուսահատվելը»:

Ըստ Լալա Մնացականյանի` հանդիսատեսը սկսում է գնալ թատրոն: Այդ գործում կարևոր է, որպեսզի կազմակերպվեն տարբեր տիպի փառատոններ. «Փառատոնները պետք է շատ լինեն: Դրանք են, որ հանդիսատեսի մոտ հետաքրքրություն են արթնացնում դեպի թատրոն: Այս տարի լեփ-լեցուն են մեր դահլիճները: Թատերական կյանքն, իրոք, մի պահ շատ ակտիվացավ»,- ասում է դերասանուհին: