Մարմնավաճառները «տեռորի» են ենթարկում Բագրատունյաց 13, 14 և 15 շենքերի բնակիչներին. ոստիկանությունը ստուգայց կանցկացնի

Գարեգին Նժդեհի հրապարակի մոտ գտնվող Բագրատունյաց 13, 14 և 15 շենքերի հարևանությամբ կրկին հավաքվում են մարմնավաճառներ: Այս մասին ԼՈՒՐԵՐ.com-ին հայտնեցին շենքերի մի խումբ բնակիչներ:

Մարմնավաճառները «տեռորի» են ենթարկում շրջակա բնակչությանը: Բնակիչների խոսքով՝ ամբողջ օրը բակում հայհոյախառն խոսակցություններ են, բարձր ձայներ, ավտոմեքենաների բարձր երաժշտություն, իսկ երբ նրանց փորձում են սաստել շենքի բնակիչները, այդ թվում՝ կանայք, մարմնավաճառներն սկսում են հայհոյել վերջիններիս:

Բնակիչները նշեցին, որ մարմնավաճառներին չեն կարողանում «լռեցնել» նույնիսկ տարածքում հսկողություն իրականացնող ոստիկանները:

ԼՈՒՐԵՐ.com-ը խնդրի վերաբերյալ զրուցեց նաև ՀՀ ոստիկանության հասարակայնության հետ կապերի և լրատվության վարչության աշխատակից Արմեն Մալխասյանի հետ:

Վերջինիս խոսքով՝ ոստիկանությունն օրենքով սահմանված լիազորությունների շրջանակում ստուգայցեր է անցկացնում: Մալխասյանը նշեց, որ ինքը հարցի վերաբերյալ կզգուշացնի ոստիկանության համապատասխան բաժնի աշխատակիցներին:

Հիշեցնենք, որ նախորդ տարի ևս ԼՈՒՐԵՐ.com-ն անդրադարձել էր բնակիչների խնդրին, ինչը մեր հրապարակումից հետո կարգավորվել էր: