ԱԺ-ն միաձայն ընդունեց մարտական հերթապահության ընթացքում վնասվածք ստացած զինծառայողներին արտերկրում բուժվելու հնարավորություն տվող օրինագիծը

Ազգային ժողովն առաջին ընթերցմամբ և միաձայն ընդունեց ««Զինծառայողների և նրանց ընտանիքների անդամների սոցիալական ապահովության մասին» ՀՀ օրենքում լրացում կատարելու մասին» օրենքի նախագիծը: Նախագծով մարտական հերթապահության ընթացքում վնասվածքներ ստացած զինծառայողները պետբյուջեի հաշվին արտերկրում բուժվելու հնարավորություն են ստանում, եթե Հայաստանում բուժումն անհնար է: «Արմենպրես»-ի հաղորդմամբ՝ նախագծին կողմ քվեարկեց 113 պատգամավոր:

Նախագծով սահմանվում է, որ օտարերկյա պետությունում բուժման, ճանապարհածախսի և կեցության գումարը պետական միջոցների հաշվին հոգալու իրավունքից օգտվում են մարտական հերթապահություն իրականացնելիս կամ առաջնագծում ծառայողական պարտականություններ կատարելիս վնասվածք կամ խեղում կամ դրանց հետևանքով հիվանդություն ստացած զինծառայողները, բացառությամբ, եթե ստացած վնասվածքը կամ խեղումը կամ դրանց հետևանքով ծագած հիվանդությունը նրանց կողմից կատարված կանխամտածված օրինազանցության հետեւանք է: Այն դեպքերում, երբ զինծառայողի բուժումն օտարերկրյա պե տությունում կազմակերպելու համար անհրաժեշտ է ուղեկցող անձի ներկայություն, հատուցվում է նաև ուղեկցող անձի ճանապարհածախսը և կեցությունն օտարերկրյա պետությունում:

Օրենքի ուժի մեջ մտնելուց հետո 2 ամսվա ընթացքում Հայաստանի Հանրապետության կառավարությունը սահմանում է զինվորական ծառայության ընթացքում զինծառայողի ստացած վնասվածքն արտերկրում բուժման, ինչպես նաև ճանապարհածախսի և կեցության գումար հատկացնելու կարգը և պայմանները: Օրենքի նախագծի հեղինակներն են ԱԺ անկախ պատգամավոր Էդմոն Մարուքյանը և ՀՀԿ խմբակցության պատգամավոր Արփինե Հովհաննիսյանը: