Նոր դեպքեր Արմավիրում. սուր աղիքային ինֆեկցիայից չորսամյա աղջիկ է մահացել

Այսօր ցերեկն Արմավիրի բժշկական կենտրոնի ինֆեկցիոն բաժանմունք է ընդունվել Ջրաշեն գյուղի 4-ամյա աղջիկ' ջերմություն, թուլություն, փսխում, լուծ ախտանշաններով։ Ինչպես ԼՈՒՐԵՐ.com-ը տեղեկացավ առողջապահության նախարարությունից, երեխայի վիճակը գնահատվել է միջին ծանրության' սուր աղիքային ինֆեկցիա նախնական ախտորոշումով։ Ստացել է վիճակին համապատասխան բուժում։ Երեկոյան կողմ փոքրիկի վիճակը կտրուկ վատացել է։ Տեղափոխելով վերակենդանացման բաժանմունք, մասնագետները համապատասխան միջոցներ են ձեռնարկել, սակայն երեխայի կյանքը փրկել չի հաջողվել։

Ռեանիմոբիլով «Սուրբ Աստվածամայր» բժշկական կենտրոն է տեղափոխվել նաև նույն ախտանշաններով, ծանր վիճակում գտնվող փոքրիկ տղա' Նորապատ գյուղից։

Ավելի ուշ Արմավիր քաղաքի նույն ընտանիքի երկու երեխա (տարբեր մանկապարտեզների սաներ) ևս ընդունվել են տեղի ինֆեկցիոն բաժանմունք։ Երկուսի վիճակն էլ գնահատվում է թեթև։