Երևանի Շենգավիթ համայնքում և Վանաձորում մեկնարկում են պրոբացիայի ծառայության պիլոտային ծրագրերը

Երևանում Եվրոպայի խորհրդի գրասենյակի և Նորվեգիայի կառավարության աջակցությամբ Շենգավիթ վարչական շրջանում և Վանաձորում մեկնարկում են պրոբացիայի ծառայության պիլոտային ծրագրերը: «Մենք շատ ենք կարևորում պրոբացիայի ծառայության պիլոտային ծրագրերի ներդրումը, քանի որ դրա շնորհիվ ՀՀ արդարադատության նախարարության համապատասխան ծառայությունները, նրանց աշխատակիցներն ավելի հեշտ կադապտացվեն այս ծրագրին: Բացի այդ մենք հնարավորություն կունենանք այս փորձաշրջանի ընթացքում մեզ համար առանձնացնել այնպիսի կարևորագույն խնդիրներ, որոնք հաշվի կառնվեն օրենսդրական կարգավորումները ձևավորելիս, ինչը շատ կարևոր է»,- «Արմենպրես»-ի հաղորդմամբ' հայտնեց ՀՀ արդարադատության նախարար Հովհաննես Մանուկյանը:

Երևանում Եվրոպայի խորհրդի գրասենյակի ղեկավարի տեղակալ Նաիրա Ավետիսյանը նկատեց, որ պրոբացիայի ծառայության ներդրման շուրջ քննարկումները սկսել էին դեռևս 2003 թվականին: «Ինձ համար այսօր հիրավի պատմական օր է, քանի որ մեկնարկում է մի ծրագիր, որի վերաբերյալ քննարկումներն ընթանում էին ավելի քան 12 տարի: Անշուշտ, Պրոբացիայի ծառայության լիարժեք գործարկումից առաջ ոչ միայն Հայաստանում, այլ եվրոպական մի շարք երկրներում սկզբնական շրջանում ներդրվել էին պիլոտային ծրագրեր, որոնք համապատասխան գերատեսչությունները զերծ են պահել որոշակի խնդիրներից և անճշտություններից»,- շեշտեց նա:

Իր հերթին ՀՀ արդարադատության նախարարի տեղակալ Սուրեն Քրմոյանը նշեց, որ պրոբացիայի ծառայության պիլոտային ծրագրերը իրականացվելու են Երևանի Շենգավիթ համայնքի և Վանաձորի այլընտրանքային պատիժների համապատասխան ստորաբաժանումների հիմքի վրա: «Այլընտրանքային ստորաբաժանումների շուրջ 20 աշխատակից մի քանի անգամ անցել է համապատասխան վերապատրաստում: Այս պիլոտային ծրագրի շրջանակներում մենք պետք է հասկանանք, թե պրոբացիայի ծառայությունն ինչ գործառույթներ է իրականացնելու. համաձայն հայեցակարգի պրոբացիայի ծառայությունը գործելու է մինչդատական, դատական, պատժի կատարման և դրան հաջորդող փուլերում: Բացի այդ՝ մեր եվրոպացի գործընկերները մեզ խորհուրդ են տվել, պրոբացիայի ծառայության աշխատակիցներին ուսուցանել համապատասխան հոգեբանական հմտություններ, որոնք թույլ կտան նրանց հետագայում համապատասխան զեկույց կամ եզրակացություն կազմելուց հաշվի առնել և տուժողի, և հանցագործություն կատարած անձի շահերը»,-ընդգծեց նա:

2015 թվականի ապրիլի 30-ին ՀՀ կառավարությունը հավանության է արժանացրել Հայաստանի Հանրապետությունում պրոբացիոն ծառայության ներդրման հայեցակարգը, որի շրջանակներում նախատեսվում է ստեղծել արդարադատության նախարարության պրոբացիայի պետական ծառայություն, որի հիմնական խնդիրներն են՝ կատարել ազատությունից զրկելու հետ չկապված խափանման միջոցները ու պատիժները, նպաստել քրեակատարողական հիմնարկների բեռնաթափմանը, նպաստել առավել տեղեկացված և անաչառ որոշումների կայացմանը խափանման միջոցի ընտրության և պատժի նշանակման գործընթացներում, նպաստել առավել տեղեկացված և անաչառ որոշումների կայացմանը դատապարտյալին պատժից պայմանական վաղաժամկետ ազատման կամ պատժի չկրած մասն ավելի մեղմ պատժատեսակով փոխարինման ներկայացման գործընթացներում, նպաստել հանցանք կատարած անձի ուղղմանը հասարակությունում, նպաստել սոցիալական արդարության վերականգնմանը, հանցանք կատարած անձի վերասոցիալականացումը, հասարակության անվտանգության ապահովումը՝ հանցանք կատարած անձի կողմից նոր հանցագործությունների կատարման հավանականությունը նվազեցնելու միջոցով: